Qazaqstan Tájikstannan jemis-kókónisti júıeli túrde ımporttaýǵa múddeli
«Jýyrda ótken kazaq-tájik bıznes-forýmy men Іskerlik keńestiń otyrysy kásipkerlerdiń bul salalarda ózara tıimdi baılanys ornatýǵa múddeli ekenin rastady. Atap aıtsaq, bıznes-forým kezinde 1,8 mlrd-tyń kelisimshartyna qol qoıyldy. Agroónerkásip kesheni salasynda da ózara saýdanyń kólemin arttyrýǵa zor múmkindik bar», - dedi Qasym-Jomart Toqaev.
Sondaı-aq, Prezıdent Tájikstan Qazaqstanǵa jemis-jıdek eksportyn ulǵaıta alatynyn atap ótti.
«Ótken jyldyń qorytyndysy boıynsha bizdiń eki el arasyndaǵy aýyl sharýashylyǵy ónimderiniń taýar aınalymy 40% ósip, 500 mln dollardan asty. Qazirgi jaǵdaıda men muny jaqsy kórsetkish dep sanaımyn. Qazaqstan Tájikstan úshin bıdaı men un jetkizetin iri seriktesterdiń biri bolyp esepteledi. Sonymen qatar, bizde ósimdik maıy, makaron ónimderi, sút ónimderi, kondıterlik ónimder eksportyn ulǵaıtýdyń qosymsha kózderi bar. Óz kezeginde Qazaqstan Tájikstannan jemis-kókónis ónimderin júıeli túrde ımporttaýǵa múddeli», - dedi Memleket basshysy.
Buǵan deıin habarlaǵanymyzdaı, Qazaqstan men Tájikstannyń jyldyq saýda aınalymy 1,4 mlrd dollarǵa jetken.
Tájikstan Prezıdenti Emomalı Rahmonov bıyl Qazaqstan Tájikstannyń negizgi saýda seriktesine aınalýy múmkin ekenin aıtty.
Qazaqstan men Tájikstan arasyndaǵy yntymaqtastyqty odaqtastyq deńgeıine kóterý týraly deklaratsııaǵa qol qoıyldy.
Aıta ketsek, Aqordada Qazaqstan Respýblıkasynyń Prezıdenti Qasym-Jomart Toqaev pen Tájikstan Prezıdenti Emomalı Rahmonnyń kezdesýi ótti.
Keshe Prezıdent Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
