Qazaqstan Tájikstanǵa qazaqtyń asyl tuqymdy malyn jetkizýge nıetti

ASTANA. QazAqparat - 21 maýsymda Qazaqstannyń Tájikstandaǵy Elshisi Nurlan Seıtimov Tájikstan Respýblıkasynyń Aýyl sharýashylyǵy mınıstri Sattorı Izzatýllomen kezdesti, dep habarlaıdy QazAqparat QR SІM-ge silteme jasap.

Kezdesý barysynda aýyl sharýashylyǵy salasyndaǵy ekijaqty yntymaqtastyq, aýyl sharýashylyǵy ónimderi men tehnıkalaryn ózara jetkizý máseleleri talqylandy. Taraptar tuqym sharýashylyǵy men asyl tuqymdy mal sharýashylyǵy salasyndaǵy yntymaqtastyqty damytýǵa, onyń ishinde Tájikstanǵa joǵary surypty kartop tuqymyn, genetıkalyq materıaldardy jáne joǵary ónimdi qazaqtyń asyl tuqymdy aqbas janýarlaryn jetkizýge qyzyǵýshylyq bildirdi.

Sonymen qatar, taraptar halyqty tamaq ónimderimen jáne azyq-túlik qaýipsizdigimen qamtamasyz etý eki memlekettiń basymdyqty baǵyttary bolyp tabylatynyn atap ótti. Bul turǵyda, N. Seıtimov 2016 jylǵy 28 sáýirde Astana qalasynda ótken Azyq-túlik qaýipsizdigi jónindegi Islam uıymy Bas assambleıasynyń quryltaı sessııasy aıasynda Tájikstan qol qoıǵan Jarǵyny tájik jaǵy jaqynarada ratıfıkatsııalaıdy degen úmitin bildirdi.

Suhbat sońynda qazaqstandyq dıplomat S. Izzatýlloǵa kezdesý úshin alǵysyn bildirip, qazaqstan-tájikstan qarym-qatynastaryn strategııalyq áriptestik rýhynda nyǵaıtý isindegi jemisti yntymaqtastyqqa daıyndyǵyn jetkizdi.