Qazaqstan Tájikstanǵa qansha gýmanıtarlyq kómek kórsetti

ASTANA. QazAqparat - 2006 jyldan bastap osy ýaqytqa deıin Qazaqstan Tájikstanǵa 34,5 mln dollardyń gýmanıtarlyq kómegin kórsetti. Bul týraly búgin Qazaqstannyń Tájikstandaǵy Tótenshe jáne Ókiletti Elshisi Nurlan Seıtimov aıtty, dep habarlaıdy QazAqparat.

«2006 jyldan beri biz aqshamen eseptegende 34,5 mln AQSh dollary kóleminde gýmanıtarlyq  kómek kórsettik. Olar mazýt tsısternasy túrinde kórsetildi. Sońǵy ret 3,9 mln dollardyń kómegi berildi. Buǵan deıin tabıǵı apattan keıingi alǵashqy ýaqytta qıyn jaǵdaıǵa tap bolǵan halyqqa der kezinde kómek kórsetýge arnalǵan  azyq-túlik, shatyrlar túrinde jetkizilgen edi», - dedi Nurlan Seıtimov QR Syrtqy ister mınıstrliginde BAQ ókilderine arnalǵan baspasóz máslıhatynda.

Onyń sózine qaraǵanda, Qazaqstan tájik eline turaqty túrde gýmanıtarlyq kómek kórsetip keledi.

«Óıtkeni, Tájikstan sel júrý, sý tasqyny, jer silkinisi syndy tabıǵı apattarǵa únemi tap bolyp jatady. Joldar jabylyp, turǵyndar qıyn jaǵdaılarǵa dýshar bolady. Bizdiń elimiz sony bilgennen keıin turaqty túrde kómek berip keledi. Kómegimizdi tájik halqy óte joǵary baǵalaıdy», - dedi Elshi.