Qazaqstan Tájikstanǵa 5 myń tonna mazýtty gýmanıtarlyq kómek retinde berdi

DÝShANBE. QazAqparat - Qazaqstannyń Tájikstandaǵy Elshisi Ýálıhan Tórehanov Qazaqstannyń 5 myń tonna mazýtqa arnalǵan resmı gýmanıtarlyq kómek sertıfıkatyn Tájikstan Respýblıkasy Úkimetiniń janyndaǵy Memlekettik materıaldyq rezervter jónindegi agenttiktiń dırektory Nurmahmad Ahmadzodaǵa tapsyrdy. Bul týraly QazAqparat SІM silteme jasap habarlaıdy.

Elshi óz sózinde Qazaqstan Prezıdenti Qasym-Jomart Toqaevtyń tapsyrmasyna sáıkes eldiń mańyzdy energetıkalyq obektileriniń turaqty jumys isteýi maqsatynda Tájikstanǵa 860 mln 805 myń teńge (shamamen 1,8 mln AQSh dollary) somasynda gýmanıtarlyq kómek kórsetý týraly sheshim qabyldanǵanyn atap ótti.

Gýmanıtarlyq kómek energetıkalyq qaýipsizdikti qamtamasyz etýge qosqan úlesi jáne Qazaqstan men Tájikstannyń ǵasyrlar boıǵy qarym-qatynastaryna tán baýyrlastyq pen ózara kómek kórsetkishi ekenin atap ótý qajet.

Qazaqstan tarapy Tájikstanǵa aqshalaı balamada kórsetken gýmanıtarlyq kómektiń jalpy kólemi 2006 jyldan bastap 44 mln AQSh dollardan asty.

Foto: QR SІM baspasóz qyzmeti