Qazaqstan Tájikstanǵa 3,9 mln dollar kóleminde gýmanıtarlyq kómek kórsetti

ASTANA. QazAqparat - Qazaqstannyń Tájikstandaǵy Elshisi Nurlan Seıtimov Qazaqstan Respýblıkasynyń gýmanıtarlyq kómegin tájik tarapyna resmı tabystaý rásimine qatysty. Bul týraly QR SІM baspasóz qyzmeti habarlady.

«Qazaqstan Respýblıkasy Úkimetiniń sheshimimen Tájikstanǵa 10 myń tonna, jalpy alǵanda 167 tsısterna jylytý mazýtyn jetkizý maqsatynda 3,9 mln. AQSh dollary bólindi» delingen habarlamada.

Elshi Tájikstan Respýblıkasynyń Úkimeti janyndaǵy Memlekettik materıaldyq rezervter agenttigi dırektorynyń orynbasary Sohıbdjon Zıedýlloevqa ákelingen júktiń kýáligin tapsyrdy.

Elshi Nurlan Seıtimov óz sózinde Qazaqstan jyl saıyn baýyrlas Tájikstannyń halqyna gýmanıtarlyq kómek kórsetip kele jatqandyǵyn jáne onyń jalpy somasy 2006 jyldan beri 34,5 mln. AQSh dollarynan asqanyn atap ótti.