Qazaqstan Tájikstanǵa 1 gektar jerdi 1 teńgege jalǵa beredi
Otyrysta «Qazaqstan men Tájikstan Úkimetteri arasynda dıplomatııalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkatsııalaý týraly» zań jobasyn QR Syrtqy ister mınıstriniń orynbasary Erjan Ashyqbaev tanystyrdy.
«Qazaqstan men Tájikstan arasyndaǵy qarym-qatynastar eki el Táýelsizdik alǵan sátten bastap dostyq ári stragııalyq áriptestik rýhynda damýda. Joǵary deńgeıdegi kezdesýler, túrli halyqaralyq alańdardy qosa alǵanda turaqty túrde ótkizilýde. 2018 jylǵy 14 naýryzdaǵy Tájikstan Prezıdenti Emomalı Rahmonnyń Qazaqstanǵa sapary ekijaqty árekettesýdi jandandyrýda sapaly qadam boldy»,- dedi ol.
Onyń aıtýynsha, Qazaqstan men Tájikstan Úkimetteri arasyndaǵy dıplomatııalyq ókildikterdiń ǵımarattaryn salý jer telimderin ózara berý týraly kelisimge Tájikstan Syrtqy ister mınıstri Zarıfıdiń 2010 jylǵy 24 tamyzdaǵy resmı sapary barysynda Astana qalasynda qol qoıylǵan.
«Bul kelisim - eki elde dıplomatııalyq ókildikterdiń bolýy jáne jumys isteý jaǵdaılaryn qamtamasyz etetin mańyzdy qujat. Kelisimge sáıkes, tájik tarapy qazaqstandyq tarapqa Qazaqstan elshiliginiń ǵımaratyn salý úshin Dýshanbe qalasyndaǵy Somonı dańǵyly birinshi dıplomatııalyq qalashyqtaǵy jalpy alańy 1 gektar jer ýchaskesin beretin bolady. Jalǵa berý merzimi 49 jyldy quraıdy jáne jylyna 1 somonı mólsherinde jaldaý aqysy tólenedi. Óz kezeńinde Qazaqstan tepe-teńdik negizinde tájik tarapyna Astanada Sh.Qaldaıaqov kóshesiniń ońtústiginde ornalasqan jalpy alańy bir gektar jer telimin beredi. Jalǵa berý merzimi 49 jyldy quraıdy jáne jyldyq aqysy 1 teńge», - dedi Syrtqy ister mınıstriniń orynbasary.
Erjan Ashyqbaevtyń aıtýynsha, kelisimniń úshinshi babyna sáıkes, jer ýchaskeleri boryshtardan, aýyrtpalyqtardan jáne úshinshi tulǵalardyń quqyqtarynan bos túrde beriledi. Kelisim 49 jyl boıy qoldanysta bolady. Eger taraptardyń biri dıplomatııalyq arnalar arqyly ekinshi taraptyń onyń qoldanysyn uzartpaı nıeti týraly aǵymdaǵy 49 jyldyq kezeń aıaqtalǵanǵa deıin keminde 1 jyl buryn habardar etpese kelesi 49 jyldyq kezeńge avtomatty túrde uzartylady. QR Jer kodeksi 6 babynyń 7 tarmaqshasyna sáıkes basqa memleketterdiń Qazaqstan aýmaǵyndaǵy jer paıdalaný quqyǵy QR bekitken halyqaralyq sharttarǵa sáıkes júzege asyrylady.
«2017 jylǵy mamyrda Astana qalasynyń ákimdigi atalǵan ýchaskeni segmentteý boıynsha jumysty aıaqtap, jer telimi memlekettik menshikke ótti. Osyǵan oraı qazaqstandyq tarap atalǵan kelisimdi ratıfıkatsııalaý boıynsha rásimdi bastaǵan bolatyn. Kelisimniń 13 babyna sáıkes taraptar onyń kúshine enýi úshin qajetti memleketishilik rásimderdi oryndaǵandyǵy týraly sońǵy jazbasha habarlama dıplomatııalyq arnalar arqyly alynǵan kúnnen bastap kúshine enetin bolady. Tájikstan Parlamenti kelisimdi 2014 jylǵy 1 qazandaǵy qaýlysymen qabyldaǵanyn atap ótken jón», - dedi ol.
Komıtet músheleri zań jobasyn Senattyń jalpy otyrysyna shyǵarýǵa biraýyzdan kelisti.