Qazaqstan Tájikstan zańnamasyn jetildirýge kómektespek

ASTANA. QazAqparat - Qazaqstannyń Qarjy mınıstrligi men Tájikstan Úkimeti janyndaǵy Taýarlardy, jumystar men qyzmetterdi memlekettik satyp alý agenttigi arasynda ózara yntymaqtastyq týraly memorandýmǵa qol qoıyldy, dep habarlaıdy QazAqparat.

Qujat Tájikstan Prezıdenti Emomalı Rahmonnyń  Qazaqstanǵa resmı sapary aıasynda bekitildi.

Atap aıtqanda, memorandýmǵa QR Qarjy mınıstri Baqyt Sultanov pen Tájikstannyń atalǵan agenttiginiń dırektory Bahrıddın Sırodjıddınzoda qol qoıdy. Qujat elektrondy memlekettik satyp alýlar júıesin damytýda tájirıbe ári aqparat almasýdy kózdeıdi. Qazaqstan Qarjy mınıstrliginiń mamandary Tájikstan tarapynan memlekettik satyp alýlar salasyndaǵy zańnamany jetildirý máseleleri boıynsha keńes berýge tartylmaq.

«TMD elderi bizdiń tájirıbemizge qarap otyr. Qazirgi kezde bizdiń satyp alý júıemiz 100 paıyzǵa elektrondyq túrde júrgizilýde. Sondyqtan osy búgingi qol qoıylǵan memorandýmnyń arqasynda tájirıbemizdi eksporttap jatqanymyzdy aıtýǵa bolady. Ary qaraı basqa elderge de óz tájirıbemizdi engizý josparlarymyzda bar», - dedi QR Qarjy mınıstri Baqyt Sultanov.

Búginde osy salada eki el arasynda sátti iske asyrylǵan tájirıbeler bar. Belgili bolǵandaı, QR Qarjy mınıstrliginiń vedomstvolyq baǵynyshty mekemesi «Elektrondyq kommertsııa ortalyǵy» AQ Tájikstan elektrondy memlekettik satyp alýlary aqparattyq júıesin damytýda keńes berý qyzmeti boıynsha Dúnıejúzilik bank jobasyn júzege asyrý úshin ótkizilgen baıqaýdy jeńip aldy. Aqparattyq júıeni damytýdyń osy jobasy 100 mln teńgeden astam somaǵa baǵalandy. Joba memlekettik qajettilikter úshin satyp alýlar rásimderin tolyqtaı avtomattandyrýǵa baǵyttalǵan. Bul jobany júzege asyrý sharalary 2017 jyldyń qazanynda júrgizildi.

Foto: chaikovskie.ru