Qazaqstan Tájikstan beretin sýdy Ózbekstan aýmaǵymen ótkizý máselesin talqylady

DÝShANBE. QazAqparat – Qazaqstan Tájikstannan keletin sýdy Ózbekstan aýmaǵy arqyly kedergisiz ótkizý máselesin talqylady. QazAqparat bul týraly QR Ekologııa, geologııa jáne tabıǵı resýrstar mınıstrligine silteme jasap habarlaıdy.

29 maýsymda Dýshanbe qalasynda Halyqaralyq Araldy qutqarý qory (HAQQ) Basqarmasynyń otyrysy aıasynda Qazaqstan Respýblıkasy Premer-Mınıstriniń orynbasary Roman Sklıar men QR Ekologııa, geologııa jáne tabıǵı resýrstar mınıstri Maǵzum Myrzaǵalıevtiń Ózbekstan Respýblıkasy Premer-Mınıstriniń orynbasary Shýhrat Ǵanıevpen jáne Ózbekstan Respýblıkasy Sý sharýashylyǵy mınıstri Shavkat Hamraevpen ekijaqty kezdesýi ótti.

Taraptar Shardara sý qoımasyndaǵy sý sharýashylyǵy jaǵdaıyn jaqsartý maqsatynda Ózbekstan aýmaǵy arqyly kedergisiz sý tranzıtiniń máselesin talqylady. Atalǵan sý kólemin Qazaqstan Respýblıkasynyń ótinishi boıynsha tájik tarapy «Bahrı Tochık» sý qoımasynan qosymsha jiberetin bolady.

Sondaı-aq mınıstr M.Myrzaǵalıev Transshekaralyq sý obektilerin birlesip basqarý jáne paıdalaný týraly jobany kelisýdi aıaqtaý mańyzdy ekenin atap ótti.

Kezdesý nátıjesinde taraptar Transshekaralyq sý obektilerin birlesip basqarý jáne paıdalaný týraly kelisimdi talqylaý jóninde keńes ótkizýge kelisti.