Qazaqstan tájik naryǵyna quny 3 mln. dollardy quraıtyn plastıkalyq qubyrlar jetkizedi
«Sharaǵa tamaq, hımııa, farmatsevtıka jáne mashına jasaý salasyndaǵy 30 qazaqstandyq óndirýshi qatysty. Saýda mıssııasynyń ashylý rásiminde sóz sóılegen Elshi Nurlan Seıtimov bul forýmnyń buǵan deıingi eki el bıznesmenderiniń kezdesýi sııaqty Qazaqstan men Tájikstan arasyndaǵy saýda-ekonomıkalyq baılanystardy odan ary nyǵaıta túsý úshin jemisti iskerlik baılanystardy ornatýdyń tıimdi alańy bolatyndyǵyn basa aıtty», - delingen Qazaqstannyń Tájikstandaǵy Elshiligi taratqan aqparatta.
Elshilik málimetine sáıkes, ekijaqty kelissózderge qazaqstandyq ónimdi óz naryqtarynda satýǵa qulshynys tanytyp otyrǵan 100-den astam tájik kompanııasy qatysqan.
«Aıta keterligi, bul qazaqstandyq bıznestiń Tájikstan Respýblıkasyndaǵy 7-shi saýda mıssııasy. Qazaqstandyq 120-dan astam óndirýshi qatysqan buǵan deıingi bıznes forýmdardyń nátıjesinde otandyq ónimdi jetkizýge arnalǵan 60 mln. dollardan astam somanyń kelisimsharttary jasalǵan edi», - dep atap ótedi Elshiliktiń baspasóz qyzmeti.
Al bul jolǵy bıznes forým aıasynda qazaqstandyq óndirýshi «Amitech Astana» JShS men «Plast Servıs» JAQ» dıllerlik kompanııasy arasynda jalpy somasy 3 mln. dollardy quraıtyn plastıka qubyrlardy Tájikstan naryǵyna jetkizý týraly kelisimge qol qoıylǵan. Munan bólek, eki eldiń kompanııalary arasynda tamaq, farmatsevtıka jáne basqa da salalardaǵy birqatar kelisim jasalǵan.