Qazaqstan taza energııa óndirisinde álemde mańyzdy ról atqarady – Qasym-Jomart Toqaev

SAMARQAND. KAZINFORM – Bizdiń elimiz álemdegi ıadrolyq otynnyń 40 paıyzǵa jýyǵyn qamtamasyz etý arqyly taza energııa óndirisinde mańyzdy ról atqarady. Bul týraly «Ortalyq Azııa - Eýropa Odaǵy» sammıtine qatysqan Prezıdent Qasym-Jomart Toqaev málim etti, dep habarlaıdy Kazinform agenttiginiń menshikti tilshisi Álıhan Asqar. 

– Qazaqstan dekarbonızatsııa bastamalaryn belsendi júzege asyryp keledi. Bizdiń elimiz álemdegi ıadrolyq otynnyń 40 paıyzǵa jýyǵyn qamtamasyz etý arqyly taza energııa óndirisinde mańyzdy ról atqarady. Ulttyq strategııaǵa saı, energetıkalyq qaýipsizdikti qamtamasyz etý jáne kómirtegi qaldyqtarynyń kólemin azaıtý maqsatynda atom elektr stantsııalaryn salýdy josparlap otyrmyz, - dedi Prezıdent.

Memleket basshysy byltyr Qazaqstanda Klımattyń ózgerýi jáne jasyl energetıka boıynsha Jobalyq keńse ashylǵanyn atap ótti.

– Bul bastama sý resýrstaryn basqarý, jańartylatyn energııa kózderin damytý, klımattyń ózgerýine beıimdelý jáne bıoalýandylyqty saqtaý baǵyttarynda tıimdi sheshim izdeýge arnalǵan. Atalǵan mindetterdi sátti oryndaý úshin eýropalyq seriktestirimizben birge tyǵyz qarym-qatynasta jumys isteýge nıettimiz, - dedi Qasym-Jomart Toqaev.

Aıta keteıik, Ózbekstannyń Samarqand qalasynda «Ortalyq Azııa - Eýropa Odaǵy» formatyndaǵy alǵashqy sammıt bastaldy.

Buǵan deıin Memleket basshysy Qasym-Jomart Toqaev «Ortalyq Azııa – Eýropa Odaǵy» sammıtine qatysý úshin «Kongress-ortalyqqa» kelgenin jazyp edik.

Buryn habarlaǵanymyzdaı, keshe Prezıdent Qasym-Jomart Toqaev Ózbekstanǵa jumys saparymen keldi. Onyń barysynda Memleket basshysy Eýropalyq keńes prezıdenti Antonıý Koshta, Eýropalyq komıssııa prezıdenti Ýrsýla fon der Lıaıen, Eýropalyq qaıta qurý jáne damý bankiniń prezıdenti Odıl Reno-Bassomen ekijaqty kezdesýler ótkizdi.