Qazaqstan Taısoıǵan polıgonynyń aýmaǵyn qysqartýǵa múddeli - S. Ahmetov

ASTANA. 21 qarasha. QazAqparat - Qazaqstan Taısoıǵan polıgonynyń aýmaǵyn qysqartýǵa múddeli. Ol jaıynda Reseımen aradaǵy úkimetaralyq komıssııaǵa usynys ta jasaldy. Bul týraly búgin Parlament Senatynyń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda málim boldy.

Toqtala ketetin jaıt, talqylaý barysynda senator Sársenbaı Eńsegenov Taısoıǵan polıgonyna qatysty másele kóterip, ony eldegi basqa polıgondarmen qatar qarastyrmaý kerektigin alǵa tartty. «Bul asa mańyzdy ári kúrdeli másele, memleketimizdiń qaýipsizdigi turǵysynan da óte ózekti. 9 mln 600 sharshy shaqyrym polıgon boıynsha biz Reseı Úkimetine, onyń ishinde polıgon aýmaǵyn eki mıllıonǵa deıin qysqartý týraly úkimetaralyq komıssııaǵa usynys bergen edik. Ol qaralyp jatyr. Sosyn máseleni óńiraralyq forýmda Elbasy N. Nazarbaev RF prezıdenti V.Pýtınmen kezdesýde de kóterdi. Al aldaǵy ýaqytta Reseı Qorǵanys mınıstri Shoıgý bizdiń elimizge saparmen kelmek. Sol tusta da biz osy máseleni úkimetaralyq komıssııada qaraıtyn bolamyz. Onyń nátıjesin eki eldiń Memleket basshylaryna usynatyn bolamyz. Jalpy qazaqstandyq usynystar negizinen elimizdegi polıgondardy qysqartýǵa qatysty bolyp otyr», - dedi S. Ahmetov.