Qazaqstan taıaý ýaqytta Túrkııadaǵy jyljymaıtyn múlikti satyp alatyn kóshbasshy elderdiń tizimine kirýi múmkin
ALMATY. 16 sáýir. QazAqparat - Túrkııada qazaqstandyqtardyń 57 jyljymaıtyn múlik nysany bar. Bul týraly Sinan Insaat ınvestıtsııalyq qurylys holdınginiń Qazaqstandaǵy basqarýshysy Aleksandra Sokolova búgin Almatyda ótken baspasóz máslıhatynda aıtty.
«2012 jyldyń tamyzynan bastap Túrkııada sheteldikterdiń jyljymaıtyn múlikti satyp alýy týraly ózara túsinistik qaǵıdasyn alyp tastaıtyn zań kúshine endi. Qazaqstan túriktiń jyljymaıtyn múligin eshqandaı shekteýsiz satyp alýǵa quqyly 129 eldiń tizimine enip otyr. Onda jyljymaıtyn múlik nysanyn satyp alǵan 57 qazaqstandyqtyń basy bóligin Almaty, Shymkent, Astana qalalarynyń turǵyndary quraýda», - deıdi A.Sokolova. Onyń aıtýynsha, 183 eldiń ınvestorlary 2012 jyly Túrkııadan jalpy aýmaǵy 1162 myń sharshy metr bolatyn 2 578 jyljymaıtyn múlik nysanyn satyp alǵan. Kóshbasshylar úshtigindegi Germanııa azamattaryna - 775, Reseı azamattaryna - 416, Ulybrıtanııa azamattaryna 365 nysan tıesili.
