Qazaqstan Taıaý Shyǵystaǵy eń iri kitap jármeńkesine qatysýda
Oǵan álemniń 70 memleketinen 1000-nan astam baspalar qatysyp jatyr, dep habarlaıdy QR SІM baspasóz qyzmeti. 7 kún boıy ótetin jármeńkeniń alańdarynda 100-den asa is-sharalar, onyń ishinde áıgili jazýshylarmen, jańa kitaptardyń avtorlarymen, saıasatkerlermen kezdesýler ótedi.
QR Ulttyq memlekettik Kitap palatasy «Qazaq entsıklopedııasy», «Dáýir», «QazAqparat», «Almatykitap», «Mektep» baspa-polıgrafııalyq mekemelerimen birlesip Qazaqstannyń Táýelsizdiginiń 25 jyldyǵyna arnap «Qazaqstan - Uly dala eli» kórme pavılonyn uıymdastyrdy. Kórmede Qazaqstan táýelsizdiginiń qalyptasý tarıhyn, áleýmettik-ekonomıkalyq damýyn, tabysy men jetistikterin baıandaıtyn 500-den astam kitap usynyldy.
Ábý-Dabı halyqaralyq kitap jármeńkesi jumysynyń barysynda Ámirlikter aqyny, pýblıtsıst Habıb Saıg pen «ál-Ittıhad» gazetiniń bas redaktory Muhammed ál-Hammadı «Kitap mádenıetine qosqan zor úlesi úshin» medalimen marapattaldy.
Saltanatty rásimdi ashý barysynda QR Ulttyq memlekettik Kitap palatasynyń dırektory Janat Seıdýmanov marapattaý moraldik yntalandyrýdyń biri, olardyń eńbegin moıyndaýdyń kórinisi, shyǵarmashylyq eńbegi men adal qyzmetiniń, kitap mádenıetiniń damýyna qosqan jeke úlesi, sondaı-aq kitaptyń bedelin kóterý bolyp tabylatynyn atap ótti.
Sondaı-aq, «Dáýir» respýblıkalyq polıgrafııalyq baspa kesheniniń Bas dırektory Svetlana Nazarbaeva «GEMS Education» Bilim qorynyń stıpendıanty Qazaqstan azamatshasy Saıora Shotpaqovaǵa baǵaly syılyqtar men kitaptar tabystady.
Aıta ketken jón, «Kitap mádenıetine qosqan zor úlesi úshin» medali Qazaqstan Jazýshylary odaǵy, QR Ulttyq memlekettik Kitap palatasy, Qazaqstan baspashylary, polıgrafısteri men kitap taratýshylary birlestigi (AIPK) jáne QR Kitaphana birlestigimen baspa-polıgrafııalyq salasy jumysshylaryn, kitaphana júıesiniń jumysshylaryn, jazýshylardy, aqyndardy, sondaı-aq kórnekti otandyq jáne sheteldik mádenıet, ǵylym jáne saıasat qaıratkerlerin kitap mádenıetiniń damýyna qosqan eleýli úlesi úshin marapattaýǵa arnalǵan. 
