Qazaqstan Taıaý Shyǵys elderin kelissózder ústeline qaıta oralýǵa shaqyrdy
ASTANA. QazAqparat - Syrtqy ister mınıstriniń birinshi orynbasary Muhtar Tileýberdi bastaǵan Qazaqstan delegatsııasy Taıaý Shyǵystaǵy ahýal jáne Palestına máselesi boıynsha ótken BUU Qaýipsizdik Keńesiniń otyrysyna qatysty. Bul týraly «QazAqparat» HAA QR SІM baspasóz qyzmetine silteme jasap habarlaıdy.
Ashyq brıfıng formatynda ótken kezdesý kýveıt tóraǵalyǵymen uıymdastyryldy. Atalǵan jıynda spıker retinde BUU Bas hatshysy Antonıý Gýterrısh jáne Taıaý Shyǵystaǵy beıbit protsess boıynsha BUU-nyń arnaıy úılestirýshisi Nıkolaı Mladenov sóz sóıledi. Brıfıng Palestına Memleketiniń Prezıdenti Mahmýd Abbastyń qatysýymen erekshelendi.
M.Tileýberdi halyqaralyq quqyq normalaryna sáıkes ortaq sheshimge kelý úshin Izraıl men Palestınany kelissózder ústeline qaıta oralýǵa shaqyrdy. Qazaqstandyq tarap Palestınanyń - táýelsizdikke, al Izraıldiń qaýipsizdikke quqyǵyn qoldaıtyn ustanymyn kezekti ret jetkizdi.
M.Tileýberdi sonymen qatar, taraptardy buǵan deıin qol jetkizilgen halyqaralyq kelisimderge sáıkes, Ierýsalımniń tarıhı mártebesin saqtap qalýǵa shaqyrdy. Qazaqstan taraptar arasyndaǵy senimdi qaıta qalpyna keltirip, sheshilmegen suraqtar boıynsha ortaq kelisimge kelý úshin kelissózdi bastaý qajettigin jetkizdi.
Óz kezeginde A. Gýterrısh BUU eki memlekettiń ortaq sheshimge kelýin, ıaǵnı 1967 jyldan beri Ierýsalımdeı ortaq astanasy bar eki táýelsiz memlekettiń - Izraıl men Palestınanyń beıbit ómir súrýin quptaıtynyn rastady. Ol atap aıtqanda, onjyldyq qoldaýdan keıin eki memlekettiń sheshimine qatysty jahandyq konsensýs buzylyp ketýi múmkin degen qaýpin bildirdi.
Qaýipsizdik Keńesiniń músheleri óz sózderinde palestına-ızraıldik qaqtyǵystar beıbit jolmen retteletinine jáne beıbit ómir súretin kórshiles eki eldiń formýlasyna qoldaý bildiretinderin atap ótti.
Palestına kóshbasshysy Mahmýd Abbasqa brıfıngke qatysqanyna alǵys aıta otyryp, qazaqstandyq delegatsııanyń basshysy eki memlekettiń qarym-qatynasynyń rettelýine baılanysty sóılegen sózderine ún qosty.
