Qazaqstan Taıaý Shyǵystan óz azamattaryn evakýatsııalaýǵa qansha qarjy jumsady
ASTANA. KAZINFORM — Qazaqstan Taıaý Shyǵys memleketterinen óz azamattaryn shyǵarýǵa 4 mln dollarǵa jýyq qarajat jumsady. Bul týraly Kólik mınıstri Nurlan Saýranbaev málim etti.
Onyń aıtýynsha, bastapqyda tórt myńǵa jýyq adamdy evakýatsııalaý josparlanǵan. Biraq evakýatsııa kezinde kómekke muqtaj azamattardyń sany 10 myńnan astamǵa deıin ósken.
Sondyqtan memleket avıakompanııalar shyǵyndarynyń bir bóligin ótedi.
— Onda bolǵan keıbir jolaýshylar osy avıakompanııalardan elge qaıtar bıletterin satyp alǵanyn bilesizder, ıaǵnı jolaýshylar avıakompanııalarǵa kórsetken qyzmetterin ishinara tólegen. Biz de shyǵynnyń bir bóligin ótedik. Bul turǵyda saqtandyrý táýekelderine aqy tóledik. Sonymen qatar jolaýshylardy Dýbaıdan jaqyn turǵan ózge elderge jetkizýdi qamtamasyz ettik, — dedi mınıstr.
Aıta keteıik, Taıaý Shyǵystan 10 myńnan astam Qazaqstan azamaty shyǵaryldy.
