Qazaqstan Taıaý Shyǵystaǵy janjalda esh tarapty qoldamaıdy — SІM

ASTANA. KAZINFORM — Qazaqstan kez kelgen áskerı janjaldy tek dıplomatııalyq jolmen retteýdi jaqtaıdy. Bul týraly Syrtqy ister mınıstriniń orynbasary Álibek Baqaev málim etti.

Onyń atap ótýinshe, elimiz úshinshi eldiń isine aralaspaý ustanymyn ustandy, ustanady jáne ustana da beredi.

— Bul jaǵdaıda biz esh tarapty qoldamaımyz: Iran tarabyn da, shabýylǵa ushyraǵan elderdiń tarabyn da. Biz mundaı áskerı qaqtyǵystardyń bolǵanyn múldem qalamaımyz. Al eger ol týyndaıtyn bolsa, onda olardyń sheshimi dıplomatııalyq ústel ústinen tabylýy tıis. Biz mundaı janjaldardy halyqaralyq quqyqqa, BUU jarǵysyna sáıkes sheshýge shaqyramyz jáne sol ustanymdamyz. Munyń bári atalǵan halyqaralyq qujattarda jazylǵan. Osy ustanym ózgerissiz qalady, — dedi mınıstr orynbasary Úkimet otyrysynan keıin.

Sonymen qatar, ol qajettilik týyndaǵan jaǵdaıda Qazaqstannyń janjaldasýshy taraptardyń kelissózder júrgizýi úshin alań usyný múmkindigine qatysty pikir bildirdi.

— Júgingen jaǵdaıda mundaı tájirıbemiz bar. Biz buǵan deıin de Iran máselesine qatysty Almatyda alań usynyp, ol atalǵan máseleni sheshýge mol úlesin qosty. Sırııa boıynsha sırııalyq bılik pen eldiń oppozıtsııalyq toptary arasyndaǵy kelissózderdiń 20-dan astam raýndy uıymdastyryldy. Atalǵan elderdiń alańymyzda dıplomatııalyq deńgeıde qatysýy áskerı janjaldy toqtatýǵa jáne janjaldasýshy nemese jaýlasýshy taraptardyń kelissóz ústeline otyrýyna septigin tıgizdi. Sondyqtan, bizde mundaı tájirıbe bar. Júgingen jaǵdaıda tyńǵylyqty zerdeleımiz. Búginde mundaı ótinish bolǵan joq, — dedi Álibek Baqaev.

Buǵan deıin AQSh Qarýly kúshteri Tegerannyń ıadrolyq jáne zymyrandyq múmkindikterin joıýǵa baǵyttalǵan Iran aýmaǵyndaǵy aýqymdy operatsııalardy jalǵastyryp jatqanyn jazǵan edik.