Qazaqstan Taıaý Shyǵystaǵy alty eldiń áýe keńistigine tolyq tyıym saldy

ASTANA.KAZINFORM – Qazaqstan Taıaý Shyǵystaǵy ahýaldyń ýshyǵýyna baılanysty Iran, Izraıl, Sırııa, Irak, Iordanııa jáne Lıvan áýe keńistiginiń ústinen, sheginde jáne mańynda ushýǵa tolyq tyıym engizdi. Bul týraly Azamattyq avıatsııa komıteti habarlady.

– Taıaý Shyǵysta qalyptasqan jaǵdaıǵa jáne azamattyq avıatsııa qaýipsizdigine tóngen joǵary qater deńgeıine baılanysty Qazaqstannyń avıatsııalyq ákimshiligi Iran, Izraıl, Sırııa, Irak, Iordanııa jáne Lıvan áýe keńistiginiń ústinen, sheginde jáne mańynda ushýlardy tıisti sheshim qabyldanǵanǵa deıin tolyq toqtatady, – delingen habarlamada.

Atalǵan nusqaýlyq qazaqstandyq áýe kemelerin paıdalanýshylardyń barlyq turaqty jáne turaqty emes jolaýshylar, júk jáne tehnıkalyq reısterine qatysty.

Osylaısha, 28 aqpanda Air Astana jáne FlyArystan áýe kompanııalarynyń ushý kestesine mynadaı ózgerister engizildi:

• KC263 Almaty – Medına, KC897 Almaty – Dýbaı, KC653 Almaty – Doha, KC205 jáne KC207 Astana – Dýbaı reısteri ushyp shyqqan áýejaılarǵa keri qaıtaryldy;
• KC899 Almaty – Dýbaı reısi Delı qalasyna baǵyttaldy;
• FS7617 Aqtaý – Dýbaı reısi qosalqy áýejaıǵa qondy.

28 aqpanda Taıaý Shyǵys baǵytyndaǵy ózge reısterdiń barlyǵy toqtatyldy.

SCAT áýe kompanııasynyń 28 aqpan jáne 1 naýryz kúnderine arnalǵan kestesinde Taıaý Shyǵys baǵyttary boıynsha reıster qarastyrylmaǵan.

Komıtet málimetinshe, sheteldik avıakompanııalar – Qatar Airways, Air Arabia, Air Arabia Abu Dhabi, Flydubai, Jazeera Airways, Air Cairo jáne Red Sea Airlines týroperatorlarmen birlesip is-qımyl josparyn ázirlep jatyr.

Sondaı-aq ırandyq áýe kompanııalarynyń kestesinde de ózgerister baıqalady. Qeshm Air kompanııasynyń 28 aqpandaǵy Taıaý Shyǵys baǵytyndaǵy reısteri keshiktiriledi, al Pars Air 28 aqpan men 3 naýryz aralyǵynda reıster oryndamaıdy.

Jolaýshylarǵa kómek kórsetý maqsatynda «Qazaqstannyń avıatsııalyq ákimshiligi» AQ bazasynda táýlik boıy jumys isteıtin koll-ortalyq iske qosylady: [phone].

Jolaýshylarǵa reısteriniń ózekti mártebesin áýe kompanııalarynyń resmı saıttarynan aldyn ala tekserý usynylady, sondaı-aq kelesi baılanys nómirlerine habarlasýǵa bolady:

• Air Astana: [phone], [phone], [phone];

• FlyArystan: [phone] (WhatsApp: [phone]);

• SCAT: [phone];

• Qazaq Air: [phone];

• «Nursultan Nazarbaev halyqaralyq áýejaıy» AQ: [phone];

• «Almaty halyqaralyq áýejaıy» AQ: [phone].

Buǵan deıin QR SІM Taıaý Shyǵystaǵy jaǵdaıǵa oraı jedel baılanys nómirlerin habarlady.

Sonymen qatar Irandaǵy Qazaqstan azamattarynyń arasynda zardap shekkender joq ekenin jazǵanbyz.