Qazaqstan Taıaý Shyǵysqa áskerı kontıngent jibere me – mınıstrlik jaýaby
ASTANA. KAZINFORM — Qazaqstan Beıbitshilik keńesine eshqandaı qarjylyq jarnasyz qosyldy. Jarǵyda kórsetilgen 1 mlrd AQSh dollary – erikti jarna jáne múshelik sharty bolyp sanalmaıdy.
Bul týraly Syrtqy ister mınıstrliginiń resmı ókili Erlan Jetibaev aıtty.
Onyń aıtýynsha, Qazaqstannyń Beıbitshilik keńesine qosylýy elimizdiń ulttyq múddelerine tolyq sáıkes keledi jáne dıalogty damytýǵa, halyqaralyq qaýipsizdikti qoldaýǵa, kópjaqty yntymaqtastyqty nyǵaıtýǵa baǵyttalǵan syrtqy saıasatymyzdyń strategııalyq baǵytymen úılesedi.
— Memleket basshysy bul bastamany naqty ári jedel nátıjelerge qol jetkizýge baǵyttalǵan ózekti qadam retinde baǵalady. Prezıdentimiz atap ótkendeı, beıbitshilik mazmunsyz deklaratsııalar arqyly emes, naqty is-qımyldar arqyly ornyǵýy tıis. Qarjylandyrý máselesine kelsek, Qazaqstan Beıbitshilik keńesine eshqandaı qarjylyq jarnasyz qosyldy. Jarǵyda kórsetilgen 1 mlrd AQSh dollary kólemindegi erikti jarna – múshelik sharty bolyp tabylmaıdy, bul árbir qatysýshynyń derbes quqyǵy, — dedi Erlan Jetibaev elordada ótken baspasóz máslıhatynda.
Sonymen birge, resmı ókil BAQ-ta áskerı kontıngent jiberý máseleleri talqylanyp jatqanyn, bul rette tek resmı derekkózge súıený keregin aıtty.
— Memleket basshysy óz sózinde Qazaqstan halyqaralyq turaqtandyrý kúshterin qoldaýǵa daıyn ekenin málimdedi. Atap aıtqanda, dalalyq gospıtali bar medıtsınalyq bólimshelerdi, sondaı-aq azamattyq áskerı úılestirý ortalyǵyna baqylaýshylar jiberý múmkindigi qarastyrylyp jatyr. ıAǵnı operatsııanyń tek gýmanıtarlyq quramdas bóligi týraly aıtylyp otyr. Joldaý týraly sheshim qoldanystaǵy zańnamaǵa sáıkes qatań qabyldanady, — dedi ol.
Budan bólek, Qazaqstan gýmanıtarlyq azyq-túlik jiberýge, palestınalyq stýdentter úshin Qazaqstan JOO-ynda 5 jyl merzimge 500 bilim grantyn bólýge, elektrondy úkimet salasyndaǵy tájirıbesimen bólisýge daıyn.
Eske sala ketsek, 19 aqpanda Memleket basshysy Qasym-Jomart Toqaev Beıbitshilik keńesiniń alǵashqy otyrysyna qatysty.
