Qazaqstan Taıaý Shyǵys elderinen óz azamattaryn evakýatsııalaýdy aıaqtady
ASTANA. KAZINFORM — QR Syrtqy ister mınıstrligi memlekettik organdardyń jáne sheteldik seriktesterdiń qoldaýymen Izraıl men Irannan Qazaqstan azamattaryn evakýatsııalaýdyń kezekti kezeńin aıaqtady.
25 maýsymda Qazaqstannyń Izraıl men Mysyrdaǵy elshilikteri 37 adamdy, sonyń ishinde Qyrǵyzstan men Reseıdiń 13 azamatyn evakýatsııalady. 26 maýsymda bul top «SCAT» áýe kompanııasynyń Kaır-Shymkent baǵyty boıynsha reısimen Qazaqstanǵa aman-esen oraldy. Búgingi tańda Izraılden evakýatsııalanǵandardyń jalpy sany 103 adamdy quraıdy.
Óńirdegi ahýal kúrdelengen sátten bastap Tegeran, Ashhabad, Baký men Erevandaǵy QR elshilikteriniń qoldaýymen Irannan 233 Qazaqstan azamaty sátti evakýatsııalandy. Olardyń 135-i Túrikmenstan arqyly, 25-i Ázerbaıjan arqyly, 73-i Armenııa arqyly shyqty.
Budan bólek, 23-25 maýsym aralyǵynda áýe keńistiginiń ýaqytsha jabylýyna baılanysty Qatar men Birikken Arab Ámirlikterinde bolǵan kóptegen qazaqstandyq azamattar der kezinde Otanǵa orala almady. Atalǵan elderdegi QR mekemeleri týyndaǵan máselelerdi retteý jáne otandastarymyzdyń tez arada oralýy úshin jan-jaqty konsýldyq-quqyqtyq jáne basqa da qajetti kómek kórsetti. 24-27 maýsym aralyǵynda elimizdiń Qatar men BAÁ-degi dıplomatııalyq ókildikteriniń qoldaýymen Qazaqstanǵa 1900-den astam azamat oraldy.
QR Syrtqy ister mınıstrligi Iran, Izraıl, Túrikmenstan, Mysyr, Ázerbaıjan, Armenııa, BAÁ jáne Qatar bıligine qazaqstandyqtardyń qaýipsiz shyǵýyn qamtamasyz etýdegi jedel kómegi men syndarly yntymaqtastyǵy úshin shynaıy alǵys bildiredi.
Qazaqstan SІM men elshilikteri óńirdegi jaǵdaıdy táýlik boıy baqylap, azamattarymyzǵa qajetti konsýldyq qoldaý kórsetýdi jalǵastyrýda. Shet elderdegi qazaqstandyqtardyń quqyqtaryn, qaýipsizdigin jáne amandyǵyn qamtamasyz etý QR syrtqy saıası vedomstvosynyń qyzmetindegi aıryqsha basymdyq bolyp qala beredi.
Buǵan deıin Qazaqstan áýe kompanııasy 25 maýsymnan bastap Taıaý Shyǵysqa qaıta ushatynyn jazǵanbyz.