Qazaqstan Taıaý Shyǵys elderine áýe keńistigin japty

ASTANA. KAZINFORM – Qazaqstannyń avıatsııalyq ákimshiligi Taıaý Shyǵystaǵy jaǵdaıǵa baılanysty áýe qatynasyna qatysty resmı túsinik berdi. 

— Taıaý Shyǵystaǵy soǵys qımyly men azamattyq avıatsııa qaýipsizdigine tóngen qaýiptiń joǵary deńgeıine baılanysty Qazaqstannyń avıatsııalyq ákimshiligi kelesi eskertýge deıin Iran, Izraıl, Sırııa, Irak, Iordanııa jáne Lıvannyń áýe keńistigi ústinde, ishinde jáne oǵan jaqyn jerde ushýlarǵa tolyq tyıym salady, — delingen habarlamada. 

Atalǵan nusqaýlyq qazaqstandyq áýe kemesin paıdalanýshylardyń barlyq turaqty jáne turaqty emes jolaýshylar, júk jáne tehnıkalyq reısine qatysty bolyp otyr. 

— Atalǵan nusqaýlyq jarııalanǵan sátten bastap kúshine enedi jáne mindetti oryndalýy tıis. Aımaqtaǵy jaǵdaı ózgerse, Qazaqstannyń avıatsııalyq ákimshiligi qosymsha aqparat beredi, — delingen habarlamada. 

Aıta ketelik SІM Taıaý Shyǵys óńirindegi qaýipti áskerı shıeleniske baılanysty málimdeme jasaǵan edi. 

Buǵan deıin Izraıl Iranǵa soqqy berip, áýe keńistigin jaýyp tastaǵany týraly jazǵan edik. AQSh Memlekettik hatshysy Izraıldiń Iranǵa qarsy jasaǵan soqqylaryn «birjaqty áreket» dep atap, oǵan Aq úıdiń qatysy joq ekenin málimdedi. Izraıldiń Iranǵa jasaǵan soqqysynan keıin munaı baǵasy kúrt kóterildi. Sondaı-aq Iran Izraılge 100-den astam dron jiberdi.