Qazaqstan taıaý bolashaqta Shyǵys Afrıka elderine tyńaıtqysh jetkize bastaýy múmkin
ASTANA. KAZINFORM – Bul týraly QR Ónerkásip jáne qurylys mınıstri Ersaıyn Naǵaspaevtyń Kenııa Respýblıkasynyń Investıtsııalar, saýda jáne ónerkásip mınıstri Lı Maıanı Kınıanjýımen kezdesýi arysynda aıtyldy.
QR Ónerkásip jáne qurylys mınıstrligi baspasóz qyzmetiniń habarlaýynsha,taraptar saýda-ekonomıkalyq yntymaqtastyqty damytý jáne ónerkásip salasyndaǵy ózara is-qımyldy keńeıtý máselelerin talqylady.
-Biz Kenııany Afrıkadaǵy negizgi seriktesterimizdiń biri retinde qarastyramyz. Qazaqstandyq Alageum Electric sııaqty zaýyttar Kenııa naryǵynyń tokty qaýipsiz ári tıimdi taratatyn transformatorlarǵa qajettiligin óteýge daıyn. Kenııanyń agrarlyq sektorynyń damýyn eskere otyryp, Qazaqstan tanymal álemdik brendterdiń traktorlary men kombaındarynyń túr-túrin jetkizip bere alady, –dep atap ótti Ersaıyn Naǵaspaev.
Sondaı-aq Qazaqstannyń Afrıka elderinde joǵary suranysqa ıe mıneraldy tyńaıtqyshtar óndirý salasyndaǵy áleýetine basa nazar aýdaryldy. Ótken jyly otandyq zaýyttar 1 mln tonnadan astam tyńaıtqysh shyǵardy. Ersaıyn Naǵaspaev Qazaqstan taıaý bolashaqta Shyǵys Afrıka elderine, onyń ishinde Kenııa, Efıopııa, Rýanda jáne Ýgandaǵa otandyq ónimdi jetkizý múmkindigin qarastyrýǵa daıyn ekenin atap ótti. «QazAzot», «Qazfosfat» jáne KAZ Chemicals Trading House syndy kompanııalar jyl saıyn óndiris qýattaryn arttyryp, ónim túrlerin keńeıtip jatyr. Qazaqstanda kalıı tyńaıtqyshtaryn óndirý boıynsha jańa joba iske asyrylsa, bul bolashaqta álemdik naryq qajettiliginiń shamamen 14%-yn qamtamasyz etýge múmkindik beredi.
Budan bólek, qorǵanys-ónerkásip kesheni salasyndaǵy yntymaqtastyq perspektıvalary jáne relstik bekitpelerden bastap jolaýshylar men júk vagondaryna deıingi qazaqstandyq temirjol klasteri ónimderin, sondaı-aq «Qaınar AKB» akkýmýlıator batareıalary men Silk Road Electronics turmystyq tehnıkasyn eksporttaý máseleleri talqylandy.
Kezdesý qorytyndysy boıynsha taraptar bolashaǵy zor baǵyttar boıynsha saýda-ekonomıkalyq jáne ónerkásiptik yntymaqtastyqty damytýǵa kelisti.
Osyǵan deıin elimizdi 2026 jylǵa tyńaıtqysh engizý jospary 2,3 mln tonnaǵa jetkiziletini týraly jazdyq.
-Ótken jyldyń qorytyndysy boıynsha tyńaıtqysh engizý deńgeıi alǵash ret ǵylymı negizdelgen qajettiliktiń 58%-ine jetip, 1,8 mln tonna boldy. 2026 jylǵa tyńaıtqysh engizý jospary 2,3 mln tonna,-dedi mınıstr.
