Qazaqstan taýlarynda jańbyrdan sel júrýi múmkin — Qazgıdromet

ASTANA. KAZINFORM — «Qazgıdromet» RMK Qazaqstannyń taý ózenderi boıynsha bıylǵy sýarý kezeńine arnalǵan gıdrologııalyq boljamyn usyndy.

«Qazaqstannyń ońtústigi, ońtústik-shyǵysy jáne shyǵysyndaǵy taý ózenderi úshin aldaǵy ýaqyttaǵy sý kóleminiń negizgi kórsetkishi 2023 jylǵy 1 qazan-2024 jylǵy 1 sáýir aralyǵyndaǵy ylǵal jınalý kezeńindegi jaýyn-shashynnyń jalpy kóleminen quralady», — dedi Qazgıdromettiń baspasóz hatshysy Alına Ismaǵulova ortalyq kommýnıkatsııalar qyzmetinde.

Jerdi qashyqtan zondtaý sýretterine sáıkes, 7 sáýirdegi jaǵdaı boıynsha Qazaqstannyń qar jamylǵan taýly aýmaqtarynyń kólemi: Jambyl oblysy boıynsha — 2%, Túrkistan oblysy boıynsha — 2%, Almaty oblysy boıynsha — 14%, Jetisý oblysyn boıynsha — 18%, Abaı oblysy boıynsha — 9%, Shyǵys Qazaqstan oblysy boıynsha — 63%.

Meteostansalarda júrgizilgen kópjyldyq baqylaýlarǵa sáıkes, bir táýlikte jaýyn-shashynnyń aılyq normasy túsýi múmkin, bul qaýipti tabıǵı gıdrometeorologııalyq qubylystardyń paıda bolýyna ákelýi yqtımal.

«Temperatýralyq fon kóterilip, nóser jańbyr jaýǵan jaǵdaıda, Qazaqstannyń ońtústigindegi, ońtústik-shyǵysy men shyǵysyndaǵy taý ózenderinde jańbyrdan keıin qatty sý tasqyny oryn alýy múmkin», — dedi Qazgıdromet ókili.