Qazaqstan — táýelsiz Avıatsııa ákimshiligin qurǵan alǵashqy el
ASTANA. KAZINFORM — Memleket basshysy Halyqaralyq azamattyq avıatsııa uıymy keńesiniń (ICAO) prezıdenti Salvatore Shakkıtanony qabyldady. Bul týraly Aqorda málim etti.
Kezdesý barysynda Qazaqstannyń óńirde táýelsiz Avıatsııa ákimshiligin qurǵan alǵashqy el ekeni atap ótildi. Bul qadam ushý qaýipsizdigine baqylaýdy aıtarlyqtaı kúsheıtýge múmkindik berdi. Ótken jyldan beri Monreal qalasynda Qazaqstan Respýblıkasynyń ICAO janyndaǵy Turaqty ókildiginiń keńsesi jumys isteı bastady.
— Halyqaralyq áýe tasymaldarynyń geografııasy keńeıip keledi. Búginde Qazaqstan álemniń 30-dan astam elimen tikeleı áýe qatynasyn jolǵa qoıdy. Nıý-Iork, Tokıo jáne Sıngapýr qalalaryna reıster ashý máselesi pysyqtalyp jatyr, — delingen habarlamada.
Qazaqstan Prezıdenti byltyr Almaty, Shymkent jáne Qyzylorda qalalarynda jańa termınaldar paıdalanýǵa berilgenin aıtty. Sonyń ishinde Almaty áýejaıynyń ótkizý qabileti alty ese, ıaǵnı, jylyna 2,5 mıllıonnan 14 mıllıon jolaýshyǵa deıin ulǵaıdy.
Sonymen qatar Memleket basshysy Qazaqstan men ICAO arasynda qol qoıylatyn azamattyq avıatsııa bas josparynyń mańyzyna toqtaldy. Atalǵan qujat avıatsııa sektoryn uzaqmerzimdi damytý strategııasy retinde qarastyrylady.
Óz kezeginde ICAO keńesiniń prezıdenti elimizdiń azamattyq avıatsııa salasyndaǵy jetistikterimen quttyqtady. Ol Qazaqstanda avıatsııa qarqyndy damyp, ornyqty ósim kórsetip otyrǵanyna jáne naqty qurylymy jasaqtalǵanyna nazar aýdardy.
Búgin sondaı-aq Qasym-Jomart Toqaev avıatsııa salasyndaǵy halyqaralyq yntymaqtastyqty damytý men nyǵaıtýǵa qosqan úlesi úshin Salvatore Shakkıtanony I dárejeli «Dostyq» ordenimen marapattady.
Eske sala keteıik, buǵan deıin Memleket basshysy ulttyq qurama boksshylaryn quttyqtaǵan bolatyn.