Qazaqstan táýelsizdik jyldary 1 mlrd tonnaǵa jýyq kómirdi shetelge ekporttady

NUR-SULTAN. QazAqparat – Qazaqstan ótken jyly 30,5 mln tonna kómirdi eksportqa shyǵardy. Bul týraly ІІІ Kómir ónerkásibi forýmynda QR IIDM Indýstrııalyq damý komıteti tóraǵasynyń orynbasary Turar Jolmaǵambetov aıtty, dep habarlaıdy QazAqparat tilshisi.

«2021 jyldyń qorytyndysynda elimizdiń kómir óndirýshi kompanııalary 111,7 mln tonna kómir óndirdi. Bul ótken jyldyń kórsetkishimen salystyrǵanda 2 paıyzǵa joǵary. Energııa óndiretin kásiporyndarǵa 59,3 mln tonna kómir jóneltildi. 6,8 mln tonna kómir ónerkásiptik kásiporyndarǵa jetkizildi. Halyq pen kommýnaldyq-turmystyq qajettilikke 10,7 mln tonna kómir berildi. Kómir eksporty 30,5 mln tonnany qurady. Bul ótken jylmen salystyrǵanda 2 paıyzǵa kóp», - dedi Turar Jolmaǵambetov.

Onyń dereginshe, respýblıkada energetıkalyq jáne halyq pen kommýnaldyq-turmystyq qajettilikke arnalǵan kómirdi shamamen 30 kompanııa óndiredi.

«Búginde elimizdiń kómir salasy elektr energııasyn óndirýdiń 70 paıyzyn, kokshımııa óndirisin 100 paıyz, sondaı-aq halyqty jáne kommýnaldyq sektordy otynmen tolyq qamtamasyz etedi. Salada shamamen 30 myń adam jumys isteıdi. Táýelsizdik jyldarynyń ishinde kómir óndirýshi kásiporyndar 2,7 mlrd tonna kómir óndirip, shamamen 0,8 mlrd tonna kómir taıaý jáne alys shet elderge eksportqa shyǵardy», - dedi komıtet tóraǵasynyń orynbasary.