Qazaqstan táýelsizdiginiń 30 jyldyǵyna oraı Beıjińde fotokórme ótip jatyr

NUR-SULTAN. QazAqparat – Qytaıdyń halyqaralyq almasý jastar ortalyǵynda Qazaqstan Respýblıkasy táýelsizdiginiń 30 jyldyǵyna arnalǵan fotokórmeniń saltanatty ashylýy ótti. Bul týraly QazAqparat Syrtqy ister mınıstrligine silteme jasap habarlaıdy.

Іs-sharanyń qonaqtary Qytaıdyń ortalyq memlekettik organdary, akademııalyq toptary, ǵylymı-zertteý qurylymdary men BAQ ókilderi boldy.

Qazaqstannyń Qytaıdaǵy ýaqytsha senimdi ókili Murat Muqyshev óz sózinde kórmede usynylǵan fotosýretter elimizdiń táýelsizdik jyldaryndaǵy tarıhyn, QR Tuńǵysh Prezıdenti - Elbasy N.Nazarbaevtyń memlekettiń qalyptasýyndaǵy tarıhı rólin, Prezıdent Q.Toqaevtyń aǵymdaǵy reformalaryn, Qazaqstannyń halyqaralyq problemalardy, onyń ishinde ornyqty damý, ultaralyq jáne konfessııaaralyq kelisim, qaýipsizdikti nyǵaıtý salalaryndaǵy úlesin kórsetetinin atap ótti.

Qytaı halyqaralyq almasý jastar ortalyǵy tóraǵasynyń orynbasary Chjan Hýa fotokórme Qytaı aýdıtorııasynyń erekshe qyzyǵýshylyǵyn týdyratynyn basa aıtty, óıtkeni usynylǵan fotosýretter Qytaıdyń dostas kórshisi - táýelsiz Qazaqstannyń qalyptasý tarıhyn barynsha kórsetetinin erekshe atap ótti.

Fotosýretter jandy shynaıy emotsııalardy týdyrady, serpindi ózgeristerdi bastan keshirip jatqan elimizdiń ómirindegi mańyzdy tarıhı sátterdiń kóńil-kúıi men atmosferasyn ashady.

Fotokórme 20 jeltoqsanǵa deıin jalǵasady.