Qazaqstan taýarlaryn syrtqy naryqta ilgeriletý úshin bıýdjetten qarajat bólinbek

ASTANA. QazAqparat – Kásipkerlikti yntalandyrý maqsatynda bir jylda 266 mlrd teńgege memlekettik qoldaý kórsetiledi. Bul týraly Májiliste «2024-2026 jyldarǵa arnalǵan respýblıkalyq bıýdjet týraly» zań jobasyn tanystyrý kezinde Qarjy vıtse-mınıstri Abzal Beısenbekuly aıtty, dep habarlaıdy QazAqparat tilshisi.

«Ekonomıkanyń naqty sektoryn damytýdy qoldaýǵa 2024 jylǵa 2,8 trln teńge qarastyrylǵan. Kásipkerlikti yntalandyrý maqsatynda 2024 jyly somasy 266 mlrd teńgege memlekettik qoldaý kórsetiledi. Sondaı-aq qazaqstandyq taýarlardy syrtqy naryqtarǵa jyljytý úshin kelesi jyly 8,7 mlrd teńge bólinbek. Bul 200 eksporttaýshyǵa qoldaý kórsetýge, 18 saýda mıssııasyn jáne shetelde 20 kórmeni uıymdastyrýǵa múmkindik beredi», - dedi A. Beısenbekuly.

Sonymen qatar ol óńdeý ónerkásibindegi iri jobalardy qarjylandyrýǵa 120 mlrd teńge baǵyttalatynyn aıtty.

Ónerkásip salalaryn damytý aıasynda 64 kásiporynǵa memlekettik qoldaý kórsetýge jáne ǵylymı-tehnıkalyq baǵdarlamalardy ótkizýge 8,7 mlrd teńge bólý josparlanǵan.

Budan bólek, vıtse-mınıstr agrarlyq sektordy damytýǵa 3 jyl ishinde 1,2 trln teńge jumsalatynyn aıtty.

«Kóktemgi egis jáne egin jınaý jumystaryn jeńildetilgen nesıe bólýge jyl saıyn 140 mlrd teńge qarastyrylǵan. «Aýyl amanaty» baǵdarlamasy sheńberinde kelesi jyly 100 mlrd teńge bólinedi. Sondaı-aq, Soltústik Qazaqstan oblysynyń tájirıbesi boıynsha iri ınvestıtsııalyq jobalardy iske asyrýǵa da 100 mlrd teńge somasynda nesıe beriledi», - dedi Abzal Beısenbekuly Májiliste bıýdjet boıynsha zań jobasyn tanystyra otyryp.

Budan buryn habarlanǵandaı, elimizde bıýdjet shyǵystarynyń negizgi úlesi áleýmettik salaǵa baǵyttalady.