Qazaqstan taýarlarynyń eksporty tómendedi - «QazTrade» sebebin atady

ASTANA. KAZINFORM – «QazTrade» saýda saıasatyn damytý ortalyǵy» AQ ótken jyly Qazaqstannyń keıbir taýarlary eksportynyń tómendeý sebebin atady.

Ortalyq málimetinshe, 2023 jyly qarjylaı mánde tazartylmaǵan maı eksporty kemidi.

«Negizgi sebebi – eksporttyq baǵanyń tómendeýi. 2022 jyldyń qazanynan beri tazartylmaǵan maıdyń álemdik baǵasy turaqty túrde tómendep keledi. Mamyrdaǵy jalpy quldyraý 31 paıyzdy (eýromen eseptegende) nemese teńgemen eseptegen 28 paıyzdy qurady», - dep túsindiredi «QazTrade» agenttik tilshisiniń saýalyna oraı.

Sonymen qatar un eksportynan túsetin qarajattyń tómendeýine de eksporttyq baǵanyń arzandaýy basty sebep bolyp otyr. Degenmen naqty mánde un eksporty 2 paıyzǵa artqan.

Munan bólek, kúkirt eksporty 13 paıyzǵa artqanymen aqshalaı mánde eksporttyq túsim kemidi. Ótken jyly kúkirttiń ortasha baǵasy 2022 jylmen salystyrǵanda 3 esege quldyrady.

Elimizdiń ishki naryǵynda suıytylǵan gaz tapshylyǵy baıqalady. Dál osy jaıt kógildir otyn eksportynyń qysqarýyna túrtki boldy.

Eýropalyq Odaqqa óńdelmegen alıýmınıı jetkizý kólemi birden 30 paıyzǵa azaıdy. Oǵan elektr energııasy baǵasynyń qymbat bolýyna baılanysty EO-daǵy ónim óndirisiniń qysqarýy sebep.

Ferroqorytpaǵa keler bolsaq, bul ónimniń eksporty AQSh, Japonııa, Indonezııa jáne Reseı baǵytynda kemidi. Óıtkeni, atalǵan elder ferroqorytpa ımportyn qysqartyp otyr.

Qazaqstanǵa munaı ónimderiniń eksporty Nıderlandy men Túrkııa baǵytynda ǵana 37,1 paıyzǵa azaıdy.

«Nıderlandy kórshiles elderden, máselen Belgııa men Ulybrıtanııadan satyp alýdy arttyrdy. Túrkııa Reseı men Úndistannan alyp jatyr», - dep málim etti «QazTrade».

Óńdelmegen myrysh eksporty da tómendedi. Bul jaıtqa myryshtyń álemdik baǵasynyń tómendeýi áser etti.