Qazaqstan taýarlaryn BAÁ naryǵyna shyǵarý kólemi artady - zań
ASTANA. KAZINFORM – Búgin Parlament Májilisiniń jalpy otyrysynda «Bir taraptan EAEO men oǵan múshe memleketter jáne ekinshi taraptan Birikken Arab Ámirlikteri arasyndaǵy ekonomıkalyq áriptestik týraly kelisimdi ratıfıkatsııalaý týraly» Zań qabyldandy.
Kelisimniń negizgi maqsaty - Eýrazııalyq ekonomıkalyq odaq elderi men Birikken Arab Ámirlikteri arasyndaǵy saýda qatynastaryn damytý jáne nyǵaıtý, sondaı-aq Qazaqstan taýarlaryn Birikken Arab Ámirlikteriniń naryǵyna shyǵarý úshin qolaıly jaǵdaılar jasaý.
- Atalǵan Kelisimge 2025 jylǵy 27 maýsymda Mınsk qalasynda Joǵary Eýrazııalyq ekonomıkalyq keńestiń otyrysy aıasynda qol qoıyldy. Kelisim taýar nomenklatýrasynyń 85 paıyzdan astamy boıynsha ımporttyq kedendik bajdardy joıýdy kózdeıdi. Sonymen qatar, qujat saýdadaǵy tehnıkalyq kedergilerdi azaıtý, sanıtarııalyq jáne fıtosanıtarııalyq sharalardy qoldaný, kedendik yntymaqtastyqty damytý jáne ishki naryqty qorǵaý tetikteri sııaqty mańyzdy saýda máselelerin qamtıdy. Kásipkerlik sýbektileriniń jańa jaǵdaılarǵa beıimdelýin qamtamasyz etý maqsatynda kedendik bajdardy joıý kezeń-kezeńimen júzege asyrylady. Bul ózara saýdany birtindep lıberızatsııalaýǵa jáne bıznes úshin qolaıly jaǵdaı jasaýǵa múmkindik beredi, - dedi Saýda jáne ıntegratsııa mınıstri Arman Shaqqalıev.
Jalpy alǵanda, Kelisim qazaqstandyq taýarlardyń Birikken Arab Ámirlikteri naryǵyna shyǵýyn keńeıtip, eksporttyq áleýetti arttyrýǵa yqpal etedi. Sondaı-aq, taraptar arasyndaǵy saýda-ekonomıkalyq baılanystardy nyǵaıtyp, ózara saýda kóleminiń ósýine qolaıly jaǵdaı qalyptastyrady.
- Zańdy ratıfıkatsııalaý teris áleýmettik-ekonomıkalyq nemese quqyqtyq saldarǵa ákep soqpaıdy jáne respýblıkalyq bıýdjetten qosymsha qarjy shyǵyndaryn talap etpeıdi, - dedi mınıstr.
Budan buryn habarlanǵandaı, Qazaqstan men BAÁ strategııalyq saýda-ınvestıtsııalyq seriktestikti nyǵaıtady.
