Qazaqstan taýarlardyń qaýipsizdigin qamtamasyz etý úshin qyrǵyzdarǵa qarjy bólmek
«Kelisim 2014 jylǵy 7 qarashada Qazaqstan men Qyrǵyzstan arasyndaǵy Joǵarǵy Memleketaralyq keńes otyrysynyń aıasynda memleket basshylary bergen tapsyrmaǵa sáıkes ázirlendi. Qujatqa 2016 jylǵy 28 jeltoqsanda qol qoıyldy. Kelisim normalaryna sáıkes, Qazaqstan tarapy Qyrǵyzstannyń Eýrazııalyq ekonomıkalyq odaqqa ıntegratsııasy protsesine járdemdesý maqsatynda atalǵan elge 100 mln AQSh dollaryna teń kómek kórsetedi. Kómek qyrǵyz tarapyna Eýrazııalyq ekonomıkalyq odaqqa qosylýy jónindegi «Jol kartalarynda» kózdelgen sharalardy iske asyrýǵa, atap aıtqanda EAEO kedendik shekarasynyń qyrǵyz ýchaskesinde kedendik ınfraqurylymdy jaqsartýǵa, Qyrǵyzstannyń sanıtarlyq, veterınarlyq, fıtosanıtarlyq júıelerin EAEO talaptarymen sáıkestendirýge beriledi»,-dep toqtaldy QR Ulttyq ekonomıka mınıstri Tımýr Súleımenov zań jobasy boıynsha baıandamasy barysynda.
Bul rette kómek tehnıkalyq járdemdesý týraly úkimetaralyq jekelegen hattalamalarǵa sáıkes, kezeń-kezeńmen aqsha qarajattary, taýarlar, mamandardy oqytý túrinde beriletin bolady.
Onyń sózine qaraǵanda, kezekti kómek berý transhyn qalyptastyrý maqsatynda Qyrǵyzstan jaǵy sharalar tizbesin, sonymen qatar kómektiń negizdiligin rastaıtyn qujattardyń bolýy týraly qorytyndyny usynady.
«Usynylǵan kómektik maqsatqa saı jáne tıimdi jumsalýyn baqylaý baǵytynda Qazaqstan-Qyrǵyzstan úkimetaralyq keńesi aıasynda birlesken ekijaqty Tekserý komıssııasy qurylady. Tutastaı alǵanda, memlekettik shekaranyń qazaq-qyrǵyz ýchaskesinde veterınarlyq baqylaýdy alyp tastaý boljamyn eskersek, Eýrazııalyq ekonomıkalyq odaqtyń syrtqy sulbasynda qyrǵyz ótkizý beketterin jaraqtandyrý úderisine barynsha kómek kórsetýge Qazaqstan múddeli ekenin aıta ketý kerek. Bul óz kezeginde Qazaqstan aýmaǵyna kórshi elden jáne EAEO-nyń basqa da elderinen ákelinetin taýarlardyń qajetti qaýipsizdik deńgeıin qamtamasyz etýge múmkindik beredi», - dedi Súleımenov.
