Qazaqstan tarıhynda tuńǵysh ret úsh birdeı tennısshi «Úlken dýlyǵa» týrnıriniń úshinshi aınalymyna ótti
NUR-SULTAN. QazAqparat – Qazaqstan tarıhynda tuńǵysh ret úsh birdeı tennısshi «Úlken dýlyǵa» týrnıriniń úshinshi aınalymyna ótti, dep habarlaıdy QazAqparat tilshisi.
Qazaqstandyqtar Elena Rybakına, ıÝlııa Pýtıntseva jáne Zarına Dııas Aýstralııa ashyq chempıonatynyń úshinshi aınalymynda kúsh synasatyn bolady.
Álemde jyl saıyn tórt birdeı «Úlken dýlyǵa» týrnıri ótetini belgili.
Búgin Melbýrnda Qazaqstan úshin tarıhı nátıje tirkeldi deýge bolady. Buǵan deıin qazaqstandyq tennısshiler jekeleı synda «Úlken dýlyǵa» dodalarynda mundaı tabysqa jetip kórmegen eken.
Osyǵan deıin «Úlken dýlyǵa» týrnırleriniń alǵashqy aınalymynan asa almaǵan Qazaqstannyń birinshi, álemniń 26-raketkasy, 20 jastaǵy Elena Rybakınanyń bıylǵy qarqyny jaqsy. Ol erteń álemniń 1-raketkasy, aýstralııalyq Eshlı Bartımen oınaıtyn bolady.
Reıtıngte 38-orynda turǵan ıÝlııa Pýtıntsevanyń úshinshi aınalymdaǵy qarsylasy – álemniń 3-raketkasy, rýmynııalyq Sımona Halep.
Reıtıngte 73-satydaǵy Zarına Dııas álemniń 10-raketkasy, Nıderlandy ókili Kıkı Bertenspen kúsh synasady.
Demek, úsh tennısshimiz reıtıngte úzdik ondyqqa kiretin sportshylarmen kortqa shyǵady.
Buǵan deıin Z.Dııas ózi úshin tabysty bolǵan 2014 jáne 2015 jyldary Aýstralııa chempıonatynyń úshinshi aınalymyna deıin jetken eken. Onyń alǵashqysynda S.Halepten utylsa, ekinshisinde Zarınanyń jolyn kezinde reıtıngte kósh bastaǵan taǵy bir myqty tennısshi, reseılik Marııa Sharapova kesti.
ıÝ.Pýtıntseva 2016 jyly ǵana úshinshi aınalymǵa deıin jetip, onda reseılik Margarıta Gasparıannan utyldy. Al E.Rybakına Aýstralııa dodasyna alǵash ret qatysyp otyr.
Eske sala keteıik, budan buryn Zarına Dııastyń Aýstralııa chempıonatynyń úshinshi aınalymyna shyqqanyn, ıÝlııa Pýtıntsevanyń álemniń 25-raketkasyn jeńgenin jazǵan bolatynbyz.
