Qazaqstan tarıhynda álem chempıony atanǵan boksshylar kimder

ASTANA. QazAqparat – Sanaýly kúnnen keıin Ózbekstan astanasyna tórtkúl dúnıeniń kil myqty boksshylary jınalyp, álem chempıonatynyń medaldaryn sarapqa salady. Olardyń qatarynda qazaq boksshylary da baq synaıdy, dep habarlaıdy QazAqparat tilshisi.

Atalǵan synda el namysyn kimder qorǵaıtynyn buǵan deıin jazǵan bolatynbyz.

Osy oraıda, álem birinshilikterinde qazaq boksshylarynan kimder chempıondyq tuǵyrdan kóringenin eske sala ketýdi jón sanap otyrmyz.

Áýesqoı bokstan eresekter arasyndaǵy álem birinshiligi 1974 jyldan beri uıymdastyrylyp keledi. Qazaqstan táýelsizdigin alǵanǵa deıin otandastarymyz Keńes odaǵy quramasynyń sapynda sharshy alańǵa shyǵyp kelgenin jaqsy bilemiz.

Al egemendik alǵannan keıin el atynan shyǵa bastadyq. Alǵash ret altyn alǵan otandasymyz – Bolat Jumadilov. Ol 1999 jyly Hıýstondaǵy (AQSh) týrnırde 51 keli salmaqta top jardy.

2003 jyly Bangkokta ótken álem chempıonatynda Qazaqstan quramasy 2 «altyn» aldy. Onyń birin 57 keli salmaqta Galıf Djafarov jeńip alsa, ekinshi altyndy 75 keli salmaqta Gennadıı Golovkın qanjyǵasyna baılady.

2005 jyl y Mıanıan daǵy (Qytaı) birinshilikte qazaq boksshylaryna taǵy 2 altyn medal buıyrdy. Onyń birinshisin 64 keli salmaqta Serik Sápıev jeńip alsa, ekinshisin 81 keli salmaqta Erdos Jańabergenov ıelendi.

Chıkagodaǵy 2007 jylǵy chempıonat Serik Sápıev taǵy da jeńis tuǵyrynyń eń bıik satysynan kórinip, eki dúrkin álem chempıony atandy.

2013 jyly álem chempıonaty elimizde naqtyraq aıtsaq, Almaty qalasynda ótti. Atalǵan dodada otandastarymyz 4 «altyn» jeńip aldy.

Olar: 49 keli salmaqta Birjan Jaqypov, 64 keli salmaqta Mereı Aqshalov, 69 keli salmaqta Danııar Eleýsinov jáne 75 keli salmaqta Jánibek Álimhanuly el mereıin asyryp, altynnan alqa taǵyndy.

2019 jyl y álem chempıonaty Ekaterınbýrg (Reseı)qalasynda ótti. Onda 81 keli salmaqta Bekzat Nurdáýletov chempıon atandy.

2021 jyly Belgrad (Serbııa) qalasynda jalaýy jelbiregen birinshilikte qazaq boksshylarynan 2 chempıon shyqty.

Olardyń biri – 48 keli salmaqta el namysyn qorǵaǵan Temirtas Júsipov bolsa, ekinshi júldeni 51 keli salmaqta Sáken Bıbosynov jeńip aldy.

Endi, Tashkent tórinde 1-14 mamyr aralyǵynda ótetin kezekti álem chempıonatynda jeńis tuǵyrynyń eń bıik satysyna kimder kóteriletinin aldaǵy ýaqyt kórsetedi. Biz jerlesterimizge tek sáttilik serik bolsyn dep tileımiz...