Qazaqstan tarıhyna qatysty 7 tomdyq basylym 2023 jyly jaryq kóredi

NUR-SULTAN. QazAqparat – «Ejelgi dáýirden búgingi kúnge deıingi Qazaqstan tarıhy» atty jeti tomdyq akademııalyq basylymy daıyndalyp jatyr. Bul jaıynda Senat depýtattarynyń saýalyna berilgen QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.

«Qazirgi tańda Bilim jáne ǵylym mınıstrligi «Ejelgi dáýirden búgingi kúnge deıingi Qazaqstan tarıhy» atty jeti tomdyq akademııalyq basylymyn ázirleýde. Bul jumysqa elimizdiń jetekshi ǵylymı ınstıtýttary tartyldy», - dep atap ótedi Úkimet basshysynyń orynbasary.

Onyń dereginshe, basylymdy ázirleýge jumyldyrylǵan ǵylymı mekemelerdiń qatarynda Á.Marǵulan atyndaǵy Arheologııa ınstıtýty, Halyqaralyq Túrki akademııasy, Joshy ulysyn zerdeleý ǵylymı ınstıtýty, R.Súleımenov atyndaǵy Shyǵystaný ınstıtýty, Sh.Ýálıhanov atyndaǵy Tarıh jáne etnologııa ınstıtýty, Memleket tarıhy ınstıtýty bar.

«Kóptomdyq eńbekti 2023 jyly basyp shyǵarý josparlanýda», - dedi Eraly Toǵjanov.