Qazaqstan tarıhy týraly derekti fılmderdi túsirýge BBC, Discovery men History telearnalaryn tartý kózdelýde
"Discovery, BBC, National Geographic syndy álemge tanymal brendter - birneshe ondaǵan jyldar boıy ǵylymı-tanymdyq jáne tarıhı formattardaǵy telejobalardy túsiretin táýelsiz telekompanııalar. Ókinishke oraı, Qazaqstanda mundaı kompanııalar ázirge joq. Biraq biz "Máńgilik El" arnaıy baǵdarlamasy aıasyndaǵy jobalardy júzege asyrýǵa BBC, History, Discovery, Euronews, Arte, RAI jáne basqa da shetel telekompanııalaryn tartýdy kózdep otyrmyz", - delingen mınıstrliktiń "QazAqparat" HAA resmı saýalyna bergen jaýabynda.
Mádenıet jáne sport mınıstrliginiń habarlaýynsha, "Qazaqfılm" kınostýdııasy jyl saıyn 20-25 derekti fılm túsiredi. Olardyń taqyryptyq aıasy da keń: Memleket basshysynyń qyzmeti men onyń qazirgi Qazaqstannyń damýyna qosqan úlesi, mádenıet, ǵylym jáne sport qaıratkerleriniń ómiri men eńbegi, qazaqtardyń mádenı murasy, sonymen birge Qazaqstan tarıhynyń jekelegen kezeńderi týraly túsiriledi.
Ulttyq fılmderdiń "Máńgilik El" arnaıy baǵdarlamasy Memleket basshysynyń "Qazaqstandyq jol-2050: Ortaq maqsat, ortaq múdde, ortaq bolashaq" atty halyqqa Joldaýynda berilgen tapsyrmasyn oryndaý maqsatynda jasaqtaldy. Onyń basty maqsaty qazaq memlekettiliginiń qalyptasýyn kórsetetin tarıhı-patrıottyq fılmderdi shyǵarý. Arnaıy baǵdarlamanyń jobalary Qazaqstan jáne álem kınematografısteriniń kómegimen aldaǵy úsh jyl boıy - 2015-2017 jyldar aralyǵynda túsiriledi.
