Qazaqstan tarıhy pánin oqytýdy esh kemitýge bolmaıdy - B. Dúısenbınov
ASTANA. QazAqparat - Qazaqstan tarıhy pánine ishtarlyq qylyp, ony oqytýdy esh kemitýge bolmaıdy. Búgin Parlament Májilisiniń jalpy otyrysynda depýtat Berik Dúısenbınov joǵary oqý oryndarynda «Qazaqstan tarıhy» pániniń qysqartyla bastaǵanyna qarsy shyǵyp, osy máseleni kóterdi.
Depýtattyń paıymynsha, Bilim jáne ǵylym mınıstrliginiń tıptik oqý josparynda joǵary bilim júıesiniń oqý baǵdarlamasynan «Qazaqstan tarıhyn» derbes tolyqqandy pán retinde alyp tastap, onyń ornyna «Táýelsiz Qazaqstan tarıhy» atty pándi engizý qolǵa alynǵan sekildi. Mundaı eksperıment elimizdiń úsh joǵary oqý oryndarynda, atap aıtqanda Almatydaǵy Abaı atyndaǵy Ulttyq pedagogıkalyq ýnıversıtetinde, Taraz jáne Pavlodar pedagogıkalyq ýnıversıtetterinde bastalyp ta ketkenge uqsaıdy. Depýtattyń sózine qaraǵanda, joǵary oqý oryndarynda aýdıtorııalarǵa berilgen «Qazaqstan tarıhy» pániniń saǵat sandary azaıyp, memlekettik emtıhandar alynyp tastalǵan. Tarıhshy ǵana emes, barlyq mamandyqtar osy baǵdarlamaǵa kóshirilmek eken.
Osyny aıta kele depýtat shyndyǵynda Táýelsizdik kezeń Otan tarıhy men onyń keleshegi úshin mańyzdy kezeń ekenine toqtaldy. Onyń aıtýynsha, búgingi jetistikterdiń barlyǵy aǵa býyn urpaqtarynyń, halqymyzdyń túrli tarıhı kezeńdegi qaharman erlerdiń jasampaz erliginiń tabıǵı jalǵasy bolyp tabylady.
«Tarıhı sabaqtastyǵy álsiz qoǵam túzdegi jel qýǵan qańbaqty eske salady. Otan tarıhyn oqytý isi búgingi zaman suranysyna laıyq bolǵany jón. Joǵary mektep baǵdarlamasy orta bilim júıesindegi materıaldardy qaıtalaýǵa tıis emes. Sonymen birge, Qazaqstan tarıhyn oqytý isinde bizdiń eldi memlekettik ustanym men ulttyq biregeıligi qalyptasqan eldermen teńgerip, jas urpaqtyń sanasyna otansúıgishtik sezim qalyptastyratyn isine nemquraıly qaraýǵa bolmaıdy. Otannyń júrip ótken jolyn, onyń búgingi ózekti qoǵamdyq máselelerin bilmeıtin, túsine almaǵan mamandy memleketti basqarý isine jiberýge bola ma?», - dedi depýtat.
Onyń aıtýynsha, Qazaqstan tarıhy pánin qysqartpaı, kerisinshe ony keń kólemde, meılinshe tereńdetip oqytý qajet. Onyń ústine depýtat Qazaqstan azamattyǵy Ata Zań men Qazaqstan tarıhyn bilý deńgeıi boıynsha emtıhan tapsyrǵandarǵa berilý kerektigin de eske salady.
«Keıbir kórshiles elder tarapynan «Qazaqstanda buryn memlekettilik bolmaǵan» degenge saıatyn sýyq sózder de aıtylyp qalyp jatyr emes pe? Eger biz óz tarıhymyzdy tereń bilmesek, basqa memleketterge ózimizdiń tarıhymyzdy qalaı moıyndatyp, qalaı syılatamyz. Biz ulttyń shynaıy tarıhy tek Táýelsizdik jyldary eshqandaı ıdeologııalyq shekteýlersiz qorytyla bastaǵan kezde Qazaqstan tarıhyn kelte nusqada oqytýǵa bolmaıdy dep sanaımyz. Nege biz ózimizdiń tól tarıhymyzǵa osynshama ishtarlyq jasap otyrmyz. Buny túsiný qıyn. Tipti Elbasy N. Nazarbaev: «Qazaq tarıhynda biz uıalatyn eshteńe joq. Bizge babalar tulparynyń tuıaǵymen jazylǵan, ata tarıhymyzdyń ár paraǵy erekshe qymbat. Qazaq halqynyń búgingi jáne bolashaq býyny ony árqashan maqtan etedi» dep aıtqan bolatyn. Endeshe, Qazaqstan tarıhyn oqytý kólemin budan ári eshqandaı da kemitýge bolmaıdy dep sanaımyz. Ádette eksperıment retinde engizilgen osyndaı jańalyqtar qalypty erejege aınalyp ketetini bar. Sondyqtan da, Bilim jáne ǵylym mınıstrliginen osy synaqty toqtatýdy, ult tarıhyna qatysty parasatty sheshim qabyldaýdy suraımyz», - dedi B. Dúısenbınov.
