Qazaqstan tarıhta alǵash ret Dúnıejúzilik densaýlyq saqtaý Assambleıasynyń A komıtetine basshylyq etti

Bul – densaýlyq saqtaý salasyndaǵy jahandyq saıasattyń negizgi máselelerin qaraıtyn eki mańyzdy komıtettiń biri. A komıtetiniń tóraǵasy bolyp Qazaqstan Densaýlyq saqtaý mınıstrliginiń Birinshi vıtse-mınıstri Tımýr Sultanǵazıev saılandy. Qazaqstan tóraǵalyǵy aıasynda komıtet pandemııalarǵa daıyndyq, medıtsınalyq-sanıtarııalyq alǵashqy kómekti damytý, densaýlyq saqtaý júıeleriniń turaqtylyǵy, medıtsınalyq qyzmettermen ámbebap qamtý, tsıfrlandyrý, medıtsınada jasandy ıntellektini qoldaný, mıkrobqa qarsy turaqtylyq, psıhıkalyq densaýlyq jáne ózge de jahandyq syn-qaterlerdi qosa alǵanda, strategııalyq máselelerdiń keń aýqymyn qarastyryp jatyr.

Jumystyń alǵashqy kúninde A komıteti halyqaralyq kún tártibindegi eń mańyzdy máselelerdiń biri – DDU-nyń pandemııalyq kelisimin jáne oǵan qosymshalardy ázirleýdi talqylaýǵa kiristi. Densaýlyq saqtaý mınıstrligi málimetinshe, talqylaý barysynda 60-tan astam el kelissózder úderisin jalǵastyrýdy jáne yntymaqtastyq pen ózara senim qaǵıdattaryna negizdelgen konsensýsqa qol jetkizý qajettigin qoldaıtynyn rastady.

Damýshy memleketter patogenderge, tehnologııalar men ǵylymı aqparatqa ádil qoljetimdilik máselelerine nazar aýdarsa, damyǵan elder bolashaq pandemııalarǵa den qoıýdyń tıimdi ári iske asyrylatyn halyqaralyq tetigin qalyptastyrý qajettigin atap ótti.

Talqylaýǵa Eýropalyq odaq, GAVI, South Centre, halyqaralyq uıymdar, salalyq birlestikter men kásibı qaýymdastyqtardyń ókilderi qatysty. Komıtet jumysy barysynda medıtsınalyq-sanıtarııalyq alǵashqy kómekti damytý jáne medıtsınalyq kómektiń qoljetimdiligin arttyrý úshin, ásirese shalǵaı jáne jetýi qıyn óńirlerde, tsıfrlyq sheshimderdi engizý máselelerine erekshe nazar aýdarylyp otyr.

Qazaqstan tarapy medıtsınalyq-sanıtarııalyq alǵashqy kómekti nyǵaıtý, telemedıtsınany, mobıldik medıtsınany damytý jáne densaýlyq saqtaý júıesin qarjylandyrý tetikterin jetildirý jónindegi ulttyq tásilderdi usyndy.

- Qazaqstan úshin, kóptegen elder sııaqty, shalǵaı eldi mekenderde turatyn halyqtyń medıtsınalyq kómekke teń qoljetimdiligin qamtamasyz etý máselesi ózekti. Sondyqtan biz alǵashqy býyndy júıeli túrde nyǵaıtyp, telemedıtsınalyq konsýltatsııalardy keńeıtip, medıtsınalyq kómektiń qoljetimdiligi men sapasyn arttyrý úshin zamanaýı tsıfrlyq sheshimderdi engizip kelemiz, - dep atap ótti Tımýr Sultanǵazıev.

Qazir Qazaqstandaǵy medıtsınalyq-sanıtarııalyq alǵashqy kómek jelisi shamamen 5 myń uıymdy qamtıdy. Onyń ishinde 4 myńnan astamy aýyldyq jáne shalǵaı eldi mekenderdiń turǵyndaryna qyzmet kórsetedi. Sondaı-aq elde óńirlerge jumysqa kelgen medıtsına qyzmetkerlerin áleýmettik qoldaý sharalary júzege asyrylyp jatyr.

Qazaqstannyń Dúnıejúzilik densaýlyq saqtaý assambleıasynyń A komıtetine basshylyq etýi eldiń halyqaralyq bedeliniń artyp kele jatqanyn jáne jahandyq densaýlyq saqtaý kún tártibin qalyptastyrýdaǵy róliniń kúsheıgenin kórsetti.

Aıta keteıik, DDU Ebola vırýsy sırek shtamynyń taralýyna baılanysty dabyl qaqty.