Qazaqstan tarıhynyń jeti tomdyǵy negizinde mektepke arnalǵan oqý baǵdarlamasy jasalady
ASTANA. KAZINFORM – Búgin elordadaǵy «Qazaq handyǵy: Etnosaıası tarıhy jáne syrtqy saıasaty» atty ǵylymı konferentsııada el tarıhyna arnalǵan jańa kitaptar tanystyryldy.
- Bizdiń tarıhymyz jaıyndaǵy eńbekterde bir paradoks bar. HH ǵasyrdyń basynan beri Qazaq handyǵy zerttelip keledi. Biraq bizde qazaqtyń tarıhy, Qazaq handyǵy jeke bir tarıhtyń sýbektisi retinde qarastyrylmady. Bul rette, Qazaq handyǵy basqa elderdiń saıasatyna qatysty zertteldi. Sondyqtan derbes tarıhtyń sýbektisi retinde alǵash ret búgin tanystyrylyp jatqan monografııalarda mańyzdy derekter qamtylǵan. Qazaq handyǵy jóninde tutas ári júıeli zertteý osyǵan deıin bolmady dep aıtýǵa bolady. Bizde kóptegen monografııa bar, alaıda olarda basqa elderdiń saıasatymen birge qarastyrylǵan. Osy oraıda qazir bes kitap jaryqqa shyqty. Atap aıtqanda, búgin qazaq tarıhnamasynda úlken ǵylymı jańalyqqa kýá boldyq, - dedi Májilis depýtaty, tarıh ǵylymdarynyń doktory, professor Erkin Ábil.
Sonymen qatar ol Qazaqstan tarıhyna arnalǵan jańa jeti tomdyq daıyndalyp jatqanyn eske saldy.
- Jeti tomdyq negizinde mektepke arnalǵan oqý baǵdarlamasy jasalady. Al búgin tanystyrylǵan kitaptar jeti tomdyqtyń IV jáne V tomyna enedi dep oılaımyn, sebebi avtorlardyń kóbi jeti tomdyqtyń jumysyna da jumyldyrylǵan, - dedi depýtat.
Atap aıtqanda, konferentsııa barysynda «Qazaq handyǵynyń XV ǵ. ekinshi jartysy - XVIII ǵ. birinshi jartysyndaǵy tarıhy», «XVI–XVIII ǵasyrlardaǵy Eýropa kartalaryndaǵy Qazaqstan terrıtorııasy», «Qazaq handyǵynyń entsıklopedııasy», «Qazaq handyǵynyń tarıhy» kitaptary tanystyryldy.
Aıta keteıik, osyǵan deıin Qazaqstan tarıhyna arnalǵan jańa jeti tomdyqta ne qamtylatynyn jazǵan edik.
Buǵan deıin habarlanǵandaı, bıyl qazan aıynyń basynda Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti.
Osy oraıda redaktsııa alqasy jalpy daýys berý arqyly baspaǵa daıyndaý úshin basylymnyń úshinshi tomynyń qoljazbasyn bekitý týraly sheshim qabyldady.