Qazaqstan tarıhynyń altynshy tomy bekitildi
ALMATY. KAZINFORM – Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleý boıynsha redaktsııa alqasynyń kezekti otyrysy ótti. Bul týraly Aqordanyń baspasóz qyzmeti habarlady.
Jıynda keńestik kezeńdegi Qazaqstan tarıhyna arnalǵan altynshy tomnyń qoljazbasy qaraldy.
Redaktsııa alqasy músheleriniń usynystary negizinde jańarǵan altynshy tomnyń tujyrymdamasyn, qurylymy men mazmunyn avtorlar ujymynyń jetekshisi, tarıh ǵylymdarynyń kandıdaty Kúlǵazıra Baltabaeva tanystyrdy. Qosymsha redaktsııalyq jumys barysynda 120-dan astam eskertý men usynys nazarǵa alyndy. Jalpy alǵanda altynshy tom 7 bólimnen, 19 taraýdan jáne 126 paragraftan turady. Avtorlar ujymynyń quramyna 70-ten astam ǵalym men zertteýshi engen.
Sonymen qatar tarıh ǵylymdarynyń doktory, professor Búrkitbaı Aıaǵannyń, áleýmettaný ǵylymdarynyń doktory, Fılosofııa, saıasattaný jáne dintaný ınstıtýtynyń bas dırektory Aıgúl Sádýaqasovanyń, «Alternatıva» ózekti zertteýler ortalyǵynyń dırektory, saıası ǵylymdarynyń kandıdaty Andreı Chebotarevtiń retsenzııalary tyńdaldy.
Sondaı-aq, redaktsııa alqasynyń Mámbet Qoıgeldıev, Kenjehan Matyjanov, Dıhan Qamzabekuly, Nursan Álimbaı, Erkin Ábil, Hankeldi Ábjanov sekildi músheleri óz oı-pikirlerin ortaǵa saldy.
Otyrys qorytyndysy boıynsha redaktsııa alqasy altynshy tomnyń qoljazbasyn bekitip, baspaǵa daıyndaý týraly sheshim qabyldady.
Kelesi otyrysta «Qazaqstan tarıhy: ejelgi dáýirden búginge deıin» atty akademııalyq basylymnyń Táýelsiz Qazaqstan kezeńine arnalǵan jetinshi tomy qarastyrylady.
Buǵan deıin Memlekettik keńesshi Erlan Qarın áleýmettik jelidegi jazbasynda elimizde júzege asyrylyp jatqan oń ózgeristerge qatysty pikir bildirgenin jazǵan edik.
