Qazaqstan tarıhynda qysqy Olımpıadanyń alǵashqy altyn medalin kim jeńip aldy
ASTANA. KAZINFORM — Qazaqstan tarıhynda qysqy Olımpıadanyń alǵashqy júldesin, ári alǵashqy altyn medalin 1994 jyly Vladımır Smırnov jeńip aldy. Bul elimizdiń eń alǵashqy qysqy Olımpıada oıyndaryna qatysýy edi.
Ol Norvegııanyń Lıllehammer qalasynda ótken Olımpıadada úsh birdeı medalǵa ıe boldy: altyn (50 km), kúmis (15 km) jáne kúmis (10 km).
Vladımır Smırnov shańǵy sportynan 4 dúrkin álem chempıony, 4 dúrkin Olımpıada kúmis júldegeri, eki dúrkin qola medal ıegeri.
Sol jylǵy saıysta Qazaqstan sportshylary bir altyn jáne eki kúmis medal ıelenip, jalpykomandalyq esepte 12-orynǵa taban tiredi.
Sportshy araǵa 4 jyl salyp Japonııanyń Nagano qalasynda ótken Aq Olımpıadada baq synady. Shańǵyshy bul joly da úzdikter qatarynan kórinip, qola júldege ıe boldy.
Qazaqstan sportshylary táýelsiz memleket retinde qysqy Olımpıadaǵa 1994 jyldan beri turaqty túrde qatysyp keledi. Elimiz 8 qysqy Olımpıadada boı kórsetti. Keler jyldyń 6-22 aqpan aralyǵynda ótetin Mılan jáne Kortına-d’Ampetstsodaǵy qysqy Olımpıadasyna 60 kún qaldy. Oǵan shamamen 3 500-ge jýyq sportshy qatysady. Al Qazaqstannyń namysyn 30-dan astam sportshy qorǵaıdy. Biliktilik kezeńi áli aıaqtalmaǵanyn eskersek, sportshylardyń sany ózgerýi múmkin.
Búginde Qazaqstanda qysqy olımpıadalyq sporttyń 13 túri damyp keledi. Elde qysqy sportpen 139 myńǵa jýyq adam shuǵyldanady. 1 838 jattyqtyrýshy jumys isteıdi. Qysqy sport ınfraqurylymyn damytý jáne kadr daıarlaý jumystary Jambyl oblysynan basqa barlyq óńirde júrgizilip jatyr.
Eske salaıyq, ótken aıdyń sońynda Mılan qysqy Olımpıada oıyndarynyń alaýy jaǵyldy.