Qazaqstan tarıhyna arnalǵan jańa jeti tomdyq qashan daıyn bolady
ASTANA. KAZINFORM - Qazaqstan tarıhynyń jańa jeti tomdyǵyn daıarlaý aıasynda ǵylymı qyzý pikirtalas júrip jatyr. Bul týraly QR Ulttyq mýzeıi dırektory Berik Ábdiǵalıuly málim etti.
- Memleket basshysynyń tikeleı tapsyrmasymen Qazaqstan tarıhyna arnalǵan jańa jeti tomdyq jazylyp jatyr. Osynyń aıasynda kóptegen másele týyndady. Birinshiden, Altyn Orda men Qazaq handyǵy kezeńin zerdeleıtin mamandar jetispedi. Ásirese, Altyn Ordany Reseı men ózge de sheteldik ǵalymdar jaqsy zerttep júrdi. Biraq, ótken ǵasyrdyń 40-shy jyldary bul taqyrypqa tyıym salynǵannan beri elimizde ózimizdiń mamandar tapshy boldy. Osy problemany sheshý úshin Ulyq Ulys, Joshy Ulysy, Altyn Orda taqyryby kezinde zerttelmegennen, qazaqtyń biregeıligine nuqsan keldi. Bul turǵyda Qazaq handyǵy Altyn Ordanyń murageri retinde qarastyrylmady. Sondyqtan etonosaıası tarıh turǵysynda «qazaqtar qaıdan shyqty» degen suraq kóbeıip ketti. «Altyn Orda kezeńi, Shyńǵys hannyń kezeńi bizdiń tarıhymyz emes degen» uǵym qazaqtyń biregeıliginiń qalyptasýyna keri áserin tıgizdi, - dedi B. Ábdiǵalıuly elordadaǵy «Qazaq handyǵy: Etnosaıası tarıhy jáne syrtqy saıasaty» atty ǵylymı konferentsııada.
Onyń aıtýynsha, Altyn Orda tarıhy jóninde ІІІ tomdy daıarlaý kezinde otandyq mamandardyń jetispeýi baıqaldy.
- Osy problemany sheshý úshin kezinde Joshy Ulysyn zerdeleý ǵylymı ınstıtýty arnaıy ashyldy. Qazir aýqymdy jumys atqarylyp jatyr, jańa býyn ósip keledi. Ekinshiden, jeti tomdyq aıasynda qazaq handyǵynyń tarıhyna qatysty zertteý jasaı alatyn mamandar barshylyq. Atap aıtqanda, buryndary jazylǵan eńbekte kóptegen jańa derekter eskerilmegen. Qazir endi osynyń bárin qamtý úshin qyzý pikirtalas júrip jatyr. Ǵylym men tehnologııanyń damýynyń, sondaı-aq jańa derekterdiń shyǵýynyń arqasynda Qazaq handyǵynyń tarıhyn halyqaralyq deńgeıde tanytý múmkin bolyp otyr. Bıyl jeti tomdyq aıaqtalýy kerek, keler jyly Táýelsizdiktiń 35 jyldyǵy aıasynda tolyq basylyp shyǵady. Qazir tórtinshi tomdy talqylap jatyrmyz, ıaǵnı Qazaq handyǵynyń tarıhy boıynsha qyzý pikirtalasty baıqadyq, - dedi Berik Ábdiǵalıuly.
Aıta keteıik, osyǵan deıin Qazaqstan tarıhyna arnalǵan jańa jeti tomdyqta ne qamtylatynyn jazǵan edik.
Buǵan deıin habarlanǵandaı, bıyl qazan aıynyń basynda Almatyda Memlekettik keńesshi Erlan Qarınniń tóraǵalyǵymen «Qazaqstan tarıhy: ejelgi dáýirden búginge deıin» atty jeti tomdyq akademııalyq basylymdy ázirleýge qatysty redaktsııa alqasynyń kezekti otyrysy ótti.
Osy oraıda redaktsııa alqasy jalpy daýys berý arqyly baspaǵa daıyndaý úshin basylymnyń úshinshi tomynyń qoljazbasyn bekitý týraly sheshim qabyldady.
