Qazaqstan tarapynan Tájikstanǵa áskerı-tehnıkalyq kómek ne úshin kórsetiledi
Kelisimge 2018 jyly 27 jeltoqsanda QR Prezıdentiniń tapsyrmasyn jáne tájikstandyq taraptyń áskerı-tehnıkalyq kómek kórsetý jónindegi suranymyn júzege asyrý maqsatynda qol qoıyldy.
«Tájikstanǵa áskerı-tehnıkalyq múlikti berý Qazaqstan Qarýly Kúshteriniń jaýyngerlik daıarlyǵy men elimizdiń qorǵanys qabilettiligine esh áserin tıgizbeıtinin atap ótken jón. Sebebi beriletin múlik bizdiń qoımalarymyzda qajetti kólemde bar. Tájik-aýǵan shekarasyna irgeles aýdandaryndaǵy qaýipsizdik salasyndaǵy jaǵdaıy shıelenisýine baılanysty áskerı-tehnıkalyq kómek kórsetý - Tájikstan qarýly kúshteriniń osy qaýipterdi qaıtarýǵa degen múmkindikterin arttyrady jáne Ortalyq Azııa óńiriniń qaýipsizdigin kúsheıtýge yqpal etedi», - dedi QR Qorǵanys mınıstriniń orynbasary Talǵat Muhtarov.
Onyń sózine qaraǵanda, tájikstandyq tarap áskerı múlikti nemese ony paıdalaný quqyn úshinshi tarapqa bermeıdi.
«Qujat Tájikstan tarapyna áskerı múlikti, ıaǵnı oq-dárilerdi, avıatsııalyq zaqymdaý quraldaryn, artıllerııalyq aspaptardy, radıatsııalyq, hımııalyq jáne bıologııalyq qorǵanys múligin, tyldyq ári medıtsınalyq múlikti bir rettik óteýsiz berýdi kózdeıdi. Qazaqstan jaǵy ákerı múlikti Jambyl oblysynyń «Otar» stansasynan Tájikstannyń Dýshanbe qalasyna deıin temirjol kóligimen jetkizýdi qamtamasyz etedi», - dedi QR Qorǵanys mınıstriniń orynbasary Talǵat Muhtarov.
Óz kezeginde senator Talǵat Musabaev Tájikstan men Aýǵanstan shekarasyndaǵy jaǵdaı kún saıyn nasharlap kele jatqanyn atap ótti.
«Esirtki tasymaldaıtyn lańkestik toptar shekarany jıi buzýda. Sondyqtan tájikstandyq tarapqa osy kómegimiz óte qajet dep sanaımyn. Kelisimdi ratıfıkatsııalaý Tájikstan shekarasyn kúsheıtýge jáne Ortalyq Azııa aımaǵyn qorǵaýǵa úles qosady dep senemin», - dedi depýtat.
