Qazaqstan tarapy Reseı gazyn Ózbekstanǵa tasymaldaý múmkindigin talqylap jatyr – Energetıka mınıstrligi

ASTANA. QazAqparat – Qazaqstan tarapy Reseı gazynyń Ózbekstanǵa tasymaldaý múmkindigin qarastyryp jatyr. Bul týraly Úkimet otyrysynan keıin BAQ ókilderiniń saýalyna jaýap bergen Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Buǵan deıin RF Syrtqy ister mınıstri Sergeı Lavrov Reseı gazyn tasymaldaý boıynsha ekijaqty kelissózder júrip jatqanyn aıtqan bolatyn. Kelissózder júrip jatyr ma?», - dep surady BAQ ókili Energetıka mınıstrinen.

«Búginde Qazaqstan arqyly reseılik gazdy Ózbekstanǵa tranzıt máselesi boıynsha kelissóz júrip jatyr. Ol konstrýktıvti túrde júrýde. Kelissóz nátıjesin sizderge qosymsha habarlaımyz», - dep jaýap berdi mınıstr Almasadam Sátqalıev Úkimet otyrysynan soń.

Sondaı-aq, ol Reseıden Qazaqstannyń Soltústik aýmaqtary arqyly Qytaıǵa gaz qubyryn salý máselesi talqylanyp jatqanyn aıtty. Mınıstrdiń dereginshe, aldyn-ala marshrýt anyqtalǵan jáne qubyrdy salý sharttary kelisilgen.