Qazaqstan tarapy Chehııamen taýar aınalymy deńgeıin qalpyna keltirýge nıetti - Elshi
ASTANA. QazAqparat - Qazaqstan tarapy Chehııamen arada tómendep ketken taýar aınalymy deńgeıin qalpyna keltirýge nıetti. Bul týraly búgin QR Syrtqy ister mınıstrliginde ótken baspasóz máslıhatynda Qazaqstannyń Chehııadaǵy Elshisi Serjan Ábdikárimov málim etti.
Onyń sózine qaraǵanda, atalǵan elmen dıplomatııalyq qatynastardyń jyldarynda taraptar barlyq salalarda jaqsy baılanystardy qalyptastyrdy. Osy rette eki el arasynda qandaı da bir saıası jáne ekonomıkalyq problemalar joq.
Atap aıtqanda, 2009 jyly Chehııa Qazaqstandy basymdyqty 12 saýda seriktesteri qataryna qosty. Osy ýaqyttan bastap taýar aınalymy 6 esege artty.
«Eger de 2009 jyly taýar aınalymynyń kólemi 206,6 mln. AQSh dollaryn qurasa, 2014 jyly bul kórsetkish 1,2 mlrd. dollarǵa jetti. Alaıda, ótken jyly álemdik qarjy daǵdarysy saldarynan, shıkizattyq eksporttyq pozıtsııalarǵa baǵanyń tómendeýinen, jalpy álemdegi jaǵdaıǵa baılanysty taýar aınalymy bizde eki esege jýyq tómendep, 666 mln. dollardy qurady. Degenmen de biz optımıstik kúıde barlyq tetikter keshenin iske qosyp, taýar aınalymyn arttyrmaqpyz»,-dedi dıplomat.
Bul turǵyda búginde saýda-ekonomıkalyq, ónerkásiptik jáne ǵylymı-tehnıkalyq yntymaqtastyq boıynsha ekijaqty úkimetaralyq komıssııa tabysty jumys isteýde. Sońǵy otyrys Astanada ótken jyly kúzde ótken bolatyn, al kelesi jıyn Pragada uıymdastyrylmaq.
Aıta keteıik, atalǵan el mashına qurylysyndaǵy ónerkásiptik áleýetimen, avtomobıl qurastyrý, elektr tehnıkasy, túrli jabdyqtardy qurastyrý baǵytynda Qazaqstan úshin qyzyǵýshylyq týdyrýda.
Elshiniń paıymynsha, Chehııadan Qazaqstannyń aýyl sharýashylyǵy sektoryna tehnologııalardy tartý múmkindigi bar.
