Qazaqstan Tanzanııamen dıplomatııalyq qatynas ornatty
ASTANA. QazAqparat - Nıý-Iorkte Qazaqstan Respýblıkasy men Tanzanııa Birikken Respýblıkasynyń BUU janyndaǵy turaqty ókilderi Qaırat Omarov pen Modast Djonatan Mero eki el arasyndaǵy dıplomatııalyq qatynastardy ornatý týraly birlesken kommıýnıkege qol qoıdy.
Bul týraly QR SІM baspasóz qyzmeti habarlaıdy.
Qol qoıý rásimi barysynda Qazaqstan men Tanzanııanyń turaqty ókilderi ekonomıkanyń ártúrli salalarynda yntymaqtastyq ornatýǵa jáne ekijaqty áriptestiktiń perspektıvalaryn egjeı-tegjeıli talqylaýǵa qyzyǵýshylyq bildirdi.
Modast Djonatan Mero eldiń aǵymdaǵy áleýmettik-ekonomıkalyq damýy jáne iri ınfraqurylymdyq jobalar týraly áńgimeledi. Kópjaqty yntymaqtastyq sheńberinde dıplomattar BUU kún tártibindegi kóptegen máseleler boıynsha, onyń ishinde terrorızmge qarsy kúresý, Uıymdy reformalaý jáne Turaqty damý maqsattaryn júzege asyrý salalaryndaǵy ustanymdardyń uqsastyǵyn atap ótti. Osy jáne basqa salalardaǵy yntymaqtastyqty keńeıtýge jáne halyqaralyq qurylymdarda ózara qoldaý kórsetý týraly kelisimge qol jetkizildi.
Tanzanııa Birikken Respýblıkasy - halqynyń sany shamamen 55 mıllıon adamdy quraıtyn Shyǵys Afrıkadaǵy eń úlken memleket. Resmı derekterge sáıkes, eldiń Jalpy Іshki Ónim (JІÓ) ósimi 2017 jyly 7,1 paıyzdy qurady. JІÓ-niń tórtten biri aýyl sharýashylyǵy bolyp
tabylady, bul eksporttyń 85 paıyzyn quraıdy.
Sońǵy jyldary halyqaralyq qarjy ınstıtýttardyń kómegi arqasynda Tanzanııa ınfraqurylymdyq jobalardy jáne altyn, temir, almaz, tanzanıt degen tabıǵı resýrstardy belsendi damytýda.
