Qazaqstan «Tank bıatlony-2015» saıysynyń kóshbasshylar úshtiginde (FOTO)

ASTANA. QazAqparat - Alabıno polıgonynda «Tank bıatlony» ekıpajdary jeke saıystarynyń qorytyndysy shyǵaryldy. Sondaı-aq, jarystyń jartylaı fınalynda kúresti jalǵastyratyn segiz komandanyń aty ataldy, dep habarlaıdy QRr Qorǵanys mınıstrliginiń baspasóz qyzmeti.

Sonymen, jeke jáne jalpy komandalyq esepte úzdikter úshtiginde Qazaqstan, Reseı jáne Qytaı tankishileri. Úndistan men Armenııa tórtinshi jáne besinshi orynda. Segizdikti Serbııa, Qyrǵyzstan jáne Tájikstan túıindedi. Kýveıt, Mońǵolııa, Venesýela, Angola men Nıkaragýa «Tank bıatlonynan» shyǵyp ketti.

«Qazaqstan komandasynyń sheberligi anaǵurlym shyńdalǵan. Nátıjeler óte jaqsy. Ótken jylmen salystyrǵanda básekelestik kúsheıgen. Oıyndar óte sátti. Bul mashınalar men ekıpajdardyń saıysy ǵana emes, bul elder arasyndaǵy dostastyq», - deıdi RF QK Qurlyq áskerleriniń bas qolbasshysy general-polkovnık Oleg Salıýkov. Jeke jarystyń basynan bastap «Tank bıatlonyndaǵy» negizgi báseke Qazaqstan men Reseı arasynda boldy. Eki eldiń ekıpajdary teńbe-teń kele jatty. Komandalardy birneshe upaı ǵana bólip turdy. Endi tankishilerimizge sońǵy «Estafeta» kezeńinde sátti óner kórsetip, sheshýshi kezeńge shyǵý qajet. Onda myqty komandalardyń ishinen «Tank bıatlony-2015» jarysynyń jeńimpazy anyqtalady.