Qazaqstan Taılandty ASEAN naryǵyna shyǵatyn mańyzdy qaqpa retinde qarastyrady — Ermek Kósherbaev
ASTANA. KAZINFORM — Qazaqstan Respýblıkasy Premer-Mınıstriniń orynbasary — Syrtqy ister mınıstri Ermek Kósherbaev Taıland Koroldigi Premer-Mınıstriniń orynbasary, Syrtqy ister mınıstri Sıhasak Pýangketkeo Táýelsizdik saraıynda ótken ekijaqty kezdesýden keıin kelissózderdiń qorytyndysy boıynsha málimdeme jasady.
— Biz ózekti ekijaqty kún tártibin jan-jaqty talqylap, ony odan ári keńeıtýdiń jańa múmkindikterin qarastyrdyq, — dedi Ermek Kósherbaev.
Ermek Kósherbaevtyń aıtýynsha, Qazaqstan men Taıland arasyndaǵy yntymaqtastyqty aýyl sharýashylyǵy, azyq-túlik óndirisi, kólik jáne logıstıka, jasyl energetıka, strategııalyq mıneraldar salalarynda, sondaı-aq azamattar arasyndaǵy baılanystar men týrızm baǵyttaryn ártaraptandyrý arqyly nyǵaıtýǵa bolady.
— Búgin biz 2027–2028 jyldarǵa arnalǵan Birlesken is-qımyl josparyna qol qoıdyq, — dedi ol.
Mınıstrdiń sózinshe, bul qujat barlyq basym baǵyttar boıynsha eki el arasyndaǵy seriktestikti tereńdetý men keńeıtýdiń naqty jol kartasyna aınalady.
— Biz Taılandty ASEAN naryǵyna shyǵatyn mańyzdy qaqpa retinde qarastyramyz. Sonymen qatar, Taıland Qazaqstan arqyly Ortalyq Azııa men Eýrazııalyq ekonomıkalyq odaq naryqtaryna keńirek qol jetkize alady. Osy baǵyttaǵy yntymaqtastyqqa erekshe mán beremiz, — dedi Ermek Kósherbaev.
Óz kezeginde Taıland Syrtqy ister mınıstri Sıhasak Pýangketkeo bıyl Qazaqstan men Taıland dıplomatııalyq qarym-qatynastardyń ornaǵanyna 35 jyl tolýyn atap ótip jatqanyn aıtty.
— Meniń saparymnyń maqsaty — ózara is-qımyldyń jańa múmkindikterin aıqyndap, ekijaqty qarym-qatynasty anaǵurlym berik áriptestik deńgeıine kóterý. Biz Qazaqstanmen ekonomıkany damytý jáne Ortalyq Azııa elderimen yntymaqtastyqty keńeıtý baǵyttaryn qosa alǵanda, kóptegen salada birlesip jumys isteýdiń zor áleýetin kórip otyrmyz. Sonymen qatar, kópjaqty deńgeıdegi seriktestikti keńeıtýge múddelimiz. Bizdi birqatar halyqaralyq bastamalar men ózara is-qımyldy odan ári damytý jónindegi ortaq kózqaras biriktiredi, — dedi Taılandtyń syrtqy saıasat vedomstvosynyń basshysy.
Onyń aıtýynsha, taraptar Azııadaǵy ózara is-qımyl jáne senim sharalary jónindegi keńes (AÓSShK) pen ASEAN aıasyndaǵy yntymaqtastyq máselelerin de talqylaǵan. Taıland ASEAN jobalaryna belsendi qatysyp, óńirlik bastamalarda senimdi seriktes bolýǵa nıetti.
— Biz ınvestıtsııa máselelerine erekshe nazar aýdaramyz. Búgin qurmetti mınıstr atap ótken kóptegen baǵyttardy talqyladyq. Eki el arasyndaǵy taýar aınalymy ósip keledi, alaıda saýda-ekonomıkalyq baılanystardy odan ári damytý úshin qosymsha kúsh-jiger qajet dep sanaımyz, — dedi Sıhasak Pýangketkeo.
Mınıstrdiń sózinshe, Taıland ózara ınvestıtsııalar kóleminiń artýyna jáne azyq-túlik qaýipsizdigin nyǵaıtýǵa múddeli. Sondaı-aq densaýlyq saqtaý men medıtsına salalaryndaǵy birlesken jobalardy júzege asyrýǵa qyzyǵýshylyq tanytyp otyr.
Kezdesý barysynda saýdany damytý jáne taýar aınalymyn ulǵaıtý jónindegi jol kartasy da talqylandy. Taıland tarapy saýda komıssııalary men jumys toptarynyń kezdesýin ótkizýdi josparlap otyr.
— Biz Qazaqstandy Ortalyq Azııaǵa shyǵatyn mańyzdy qaqpa retinde qarastyramyz. Sonymen qatar Eýrazııalyq ekonomıkalyq komıssııamen kelissózderdi bastaýǵa múddelimiz jáne osy dıalogty damytýda Qazaqstannyń qoldaýyna senim artamyz, — dedi ol.
Sıhasak Pýangketkeonyń aıtýynsha, Qazaqstan Orta dálizdiń mańyzdy bóligi sanalady.
— Saýda, ınvestıtsııa jáne basqa da baǵyttarda bizdiń seriktestigimizdiń nyǵaıyp kele jatqanyn kórip otyrmyz, — dep túıindedi Taıland Syrtqy ister mınıstri.
Buǵan deıin Qazaqstan men Taıland yntymaqtastyqty odan ári nyǵaıtýǵa nıetti ekenin jazǵanbyz.
