Qazaqstan taǵy eki memleketpen sottalǵandardy berý týraly kelisimdi rásimdeıdi
NUR-SULTAN. QazAqparat - Búgin Májilis depýtattary Qazaqstan men Lıtva arasyndaǵy sottalǵandardy berý týraly shartty ratıfıkatsııalaý týraly zań jobasyn maqulady, dep habarlaıdy QazAqparat tilshisi.
QR Bas prokýrorynyń orynbasary Marat Axmetjanovtyń aıtýynsha, ondaı sharttar 18 elmen jasalǵan.
«Qazirgi tańda biz Bolgarııa jáne Soltústik Makedonııamen qol qoıýdy qarastyryp jatyrmyz», - dedi M.Axmetjanov QR Parlament Májilisiniń plenarlyq otyrysynda.
Aıta keteıik, Lıtvamen aradaǵy shartqa májbúrli túrde medıtsınalyq emdeýge jiberilgen azamattar da kiredi. Osy sanattaǵy adamdar da óz eline qaıtarylady.
QR Bas prokýrorynyń orynbasary Marat Axmetjanovtyń sózine qaraǵanda, Lıtvada Qazaqstan azamatyn sottasa, ıa bolmasa, májbúrlep emdeýge jiberse, ondaı azamattar jazany óz elinde óteıtin bolady. Lıtva Respýblıkasynyń azamattaryna qatysty sharalar da sondaı bolady.
«Shartta birqatar talaptar bar. Aldymen ol bizdiń Qazaqstannyń nemese Lıtvanyń azamaty bolýy tıis. Sottalǵan adamnyń nemese onyń zańdy ókiliniń kelisimi kerek. Eki elde de onyń jasaǵan áreketi qylmys bolyp tabylýy tıis. Berýge eki jaqtyń da kelisimi bolýy shart. Suraý kelip túsken kezden jazany kem degende alty aı ótemegen bolýy tıis», - dep atap kórsetti M.Axmetjanov.
Qujat boıynsha berýge jatpaıtyn adamdar da bar. Birinshiden, sottalǵandardyń eline qaıtarý egemendik pen qoǵamdyq tártipke nuqsan keltirse jáne ulttyq zańnama men memlekettiń múddesine qaıshy bolsa, ondaı azamattar berilmeıdi. Ekinshiden, sottalǵan adam keltirgen zalaldy ótemese, sol jerde qala beredi.
Osyǵan deıin Májilis Qazaqstan men Lıtva arasynda sottalǵan azamattardy berýge qatysty shartty ratıfıkatsııalaýǵa kelisti.
