Qazaqstan taekvondoshylary Gran-prı týrnırinde eki qola medal jeńip aldy

ASTANA. KAZINFORM - AQSh-tyń Sharlott qalasynda 2025 jylǵy Grand Prix Challenge serııasynyń alǵashqy kezeńi ótip jatyr.

Qazaqstan taekvondo federatsııasy málimetinshe, týrnırdiń ekinshi kúni Qazaqstan quramasy eki qola medal jeńip aldy.

Júldeli úshinshi orynǵa Tamerlan Tileýles (58 kelige deıin) pen Batyrhan Tóleýǵalı (80 kelige deıin) kóterildi.

Bul Tamerlannyń World Taekwondo týrnırlerindegi alǵashqy júldesi. Ásirese onyń qola medal úshin ótken kezdesýdegi jeńisi aıryqsha atap ótýge turarlyq. Qazaqstandyq sportshy Olımpıada chempıony, ıtalııalyq Vıto Dell’Akýılany 2:0 esebimen utty.

80 kelige deıingi salmaqtaǵy quramanyń kóshbasshysy Batyrhan Tóleýǵalı týrnırlik kestede senimdi óner kórsetip, qola medal úshin jekpe-jekte Chılı sportshysy Hoakın Cherchıllmen kezdesti.

Birinshi raýnd teń dárejede ótti. Alaıda ekinshi raýndta Batyrhan aıqyn basymdyq tanytyp, jeńiske jetti.

Júldeli oryndardan bólek, qazaqstandyq taekvondoshylar 2026 jyly Italııanyń Rım qalasynda ótetin kelesi Gran-prı serııasyna joldama aldy.

Aıta keteıik, Sharlotttaǵy jarys - Dúnıejúzilik taekvondo federatsııasynyń uıymdastyrýymen ótip jatqan 2025 jylǵy Grand Prix Challenge serııasynyń alǵashqy kezeńi. Týrnırge 44 elden 376 sportshy qatysty.

Aıta keteıik, para kanoedan Azııa chempıonatynda Qazaqstan quramasy 10 medal aldy.