Qazaqstan taekvondodan álem chempıonatyn ótkizýge daıyn – Qudyret Shámıev

ASTANA. KAZINFORM - Otandyq WT taekvondo federatsııasynyń prezıdenti Qudyret Shámıev Qazaqstan taekvondodan 2027 jylǵy álem chempıonatyn qabyldaýǵa daıyn ekenin aıtty. Bul týraly ol ulttyq quramanyń birlesken jıynynda jýrnalısterge bergen suhbatynda atap ótti.

- 2014 jyldan beri Qazaqstanda taekvondodan álemdik jarystar ótken joq. Birinshi kezekte, bul bizdiń oqshaýlanyp qalǵanymyzdy bildiredi. Sport bar jerde saıasat ta bar. Sol saıasat sheńberinen tym alystamaýymyz kerek. Sondyqtan, biz óz elimizde World Taekwondo aıasynda ótkiziletin iri jarystardy qabyldaýǵa múmkindigimiz bar. Atap aıtar bolsaq, tamyz aıynda Kazakhstan Open týrnırin joǵary dárejede ótkizýdi josparlap otyrmyz. Bul básekege álemdik taekvondodaǵy bedeldi tulǵalar men chempıondar shaqyrylady, - dedi taekvondo federatsııasynyń prezıdenti Qudyret Shámıev. 

Sondaı-aq, ol 2026 jyly taekvondodan Gran-prı týrnırin, al 2027 jyly taekvondodan álem chempıonatyn ótkizýge úmitker atanyp otyrǵanyn da jasyrmady. 

- 2026 jyly taekvondodan Gran-prı týrnırin, al 2027 jyly taekvondodan álem chempıonatyn ótkizýge kúsh salyp jatyrmyz. Qazirgi tańda biz osy jarystarǵa qatysty qujattardy túgel daıyndap, álemdik uıymǵa jiberdik. Elimizde taekvondoǵa degen qyzyǵýshylyqtyń joǵary ekenin ózimiz kórsetpesek, álemdik uıymnan bizge degen kózqarasty surap alý qıyn. Olarmen baılanysta bolyp, ártúrli kelip jatqan ózgerister, jańashyldyqtar, baǵdarlamalardan habardar bolýymyz kerek, - dedi Qudyret Shámıev.

Esterińizge sala keteıik, osyǵan deıin Taekvondo federatsııasynyń prezıdenti Federatsııanyń quramy tolyqtaı ózgergenin aıtyp bergen edi.