Qazaqstan tabıǵı baılyqty energııa kózi retinde paıdalaný úshin ozyq tehnologııalardy tartýǵa nıetti

ACTANA. KAZINFORM – Qasym-Jomart Toqaev «Ortalyq Azııa – Japonııa» dıalogynyń birinshi sammıtinde «Taza» energetıka máselesine toqtaldy.Bul týraly Aqordanyń baspasóz qyzmeti habarlady.

Elimiz «jasyl» tehnologııalardy qoldana otyryp, dástúrli qýat kózin ıgerý jáne óńdeý jobalaryna japon tájirıbesin, ınnovatsııasy men ınvestıtsııasyn tartýǵa múddeli ekenin aıtty.

- Taza» energetıkanyń damýyn uzaq merzimdi strategııalyq basymdyq retinde qarastyramyz. Elimiz «jasyl» tehnologııalardy qoldana otyryp, dástúrli qýat kózin ıgerý jáne óńdeý jobalaryna japon tájirıbesin, ınnovatsııasy men ınvestıtsııasyn tartýǵa múddeli. Geosaıası turaqsyzdyq pen qýat kózderine suranys udaıy artyp kele jatqan jaǵdaıda álem ekonomıkasynyń ornyqty damýyn qamtamasyz etetin kómirsýtegi resýrstary aıryqsha mańyzǵa ıe. Biz teńgerimdi ári ádil energetıkalyq júıege aýysý qajet degen ustanymdy qoldaımyz. Qazaqstan kómir óndirisi boıynsha álemdegi on úzdik eldiń qataryna kiredi. Kómir elimizdiń energetıkalyq balansynyń shamamen 70 paıyzyn quraıdy. Sondyqtan osy tabıǵı baılyǵymyzdy qýatty energııa kózi retinde paıdalaný úshin eń ozyq tehnologııalardy tartýǵa beıilmiz, - dedi Memleket basshysy.

Qasym-Jomart Toqaev Qazaqstannyń resýrs áleýetin Japonııanyń atom energetıkasy salasyndaǵy úzdik tehnologııalarymen ushtastyrý tyń múmkindikterge jol ashatynyn aıtty.

- ıAdrolyq energetıkanyń «jasyl» ekonomıka kún tártibindegi máni zor. Álemdegi ıadrolyq otynnyń shamamen 40 paıyzyn Qazaqstan qamtamasyz etedi. Dúnıe júzindegi elektr energııasynyń 10 paıyzǵa jýyǵyn atom elektr stantsııalary óndiretinin eskersek, bul óte mańyzdy. Qazaqstannyń resýrs áleýetin Japonııanyń atom energetıkasy salasyndaǵy úzdik tehnologııalarymen ushtastyrý osy strategııalyq saladaǵy tyń múmkindikterge, sonyń ishinde ınnovatsııalardy engizýge jol ashady. Ásirese, ıadrolyq qaldyqtardy basqarý, ıadrolyq qaýipsizdik, azamattyq qorǵanys salalaryna joǵary sanatty maman daıarlaý baǵytyndaǵy jobalar qyzyǵýshylyq týdyrady, - dedi Prezıdent.

Aıta keteıik, Prezıdent Qasym-Jomart Toqaev «Ortalyq Azııa – Japonııa» dıalogynyń birinshi sammıtinde sóz sóıledi.