Qazaqstan tabıǵatty paıdalanýshylar qyzmetin ekoretteýdiń jańa rejimin engizbek
ASTANA. QazAqparat - Qazaqstan tabıǵatty paıdalanýshylar qyzmetin ekologııalyq retteýdiń jańa rejimin engizýdi josparlaýda. Bul týraly búgin Halyqaralyq jasyl tehnologııalar jáne ınvestıtsııalyq jobalar ortalyǵynyń basshysy Rápil Joshybaev aıtty, dep habarlaıdy QazAqparat tilshisi.
«Elimiz úshin, ásirese ónerkásiptik jáne energetıkalyq sektor úshin Qazaqstan 2013 jyly qabyldanǵan Jasyl ekonomıkaǵa kóshý jónindegi tujyrymdamany eskerer bolsaq, basty mánge ıe. Energııa qamtymdy tómendetý, energetıkalyq balanstaǵy jańartylatyn energııa kózderiniń úlesin arttyrý, qaldyqtardy qaıta óńdeý, sý sapasy boıynsha bekitilgen negizgi kórsetkishterge qol jetkizý úshin Ekologııalyq kodeksti baıypty jańartý qajet»,- dedi ortalyq basshysy «Qazaqstannyń ozyq qoljetimdi tehnologııalar prıntsıpine kóshýi: qazirgi jaǵdaı men keleshegi» atty halyqaralyq konferentsııa barysynda.
Onyń atap ótýinshe, jańa Ekologııalyq kodekske ozyq qoljetimdi tehnologııalar prıntsıpterin engizý jónindegi jańa baǵyt Halyqaralyq jasyl tehnologııalar jáne ınvestıtsııalyq jobalar ortalyǵynyń quzyryna berilgen.
«Ortalyq Qazaqstannyń Ekologııalyq uıymdary qaýymdastyǵymen birlese otyryp, ozyq qoljetimdi tehnologııalar ustanymy negizinde tabıǵatty paıdalanýshylar qyzmetin ekologııalyq retteý jáne normalaý jónindegi jańa rejimdi engizý boıynsha usynystar ázirleıdi», - dedi Rápil Joshybaev.
